KÜRDƏMİRDƏ DÖVLƏT PROQRAMINDA NƏZƏRDƏ TUTULDUĞUNDAN İKİ DƏFƏDƏN ÇOX SAHƏDƏ ÜZÜM PLANTASİYALARI SALINMIŞDIR
Kürdəmir rayon icra hakimiyyətinin aqrar şöbəsindən AZƏRTAC-a bildirmişlər ki, son illər respublikamızda üzümçülüyə göstərilən qayğı, bununla bağlı dövlət dəstəyi təsərrüfatın bu gəlirli sahəsinin inkişafı üçün möhkəm stimul yaratmışdır. Təsadüfi deyildir ki, ölkə iqtisadiyyatı möhkəmlənib sahibkarların maddi imkanları artdıqca üzümçülüyün inkişafına sərmayə yatırımlarının həcmi də artır.
Mütəxəssislər hər hektar məhsuldar bağın yetişdirilməsinə təqribən 5-6 min ABŞ dolları məbləğində vəsait tələb olunduğunu söyləyirlər. Bu gün Kürdəmirdə ildə on hektarlarla sahədə plantasiyalar salmaq imkanına malik sahibkarlar nəsli formalaşmışdır. Onların bir çoxu məhz gəlirli sahə olan üzümçülüyə böyük maraq göstərir. Buna görədir ki, bağların sahəsi getdikcə artır.
Cari ilin birinci yarısında rayonun Karrar qəsəbə, Yeni Şıxımlı, Topalhəsənli kəndlərində 120 hektarda yeni üzüm plantasiyaları salınmışdır. Beləliklə də Dövlət Proqramının qəbulundan bəri Kürdəmirdə 634 hektarda üzümlük salınmışdır. Bu isə Proqramda nəzərdə tutulduğundan 334 hektar çoxdur.
Bölmənin digər xəbərləri
