KÜRDƏMİRDƏ GƏLƏN İLİN MƏHSULU ÜÇÜN 30 MİN HEKTARDA TAXIL ƏKİLƏCƏYİ GÖZLƏNİLİR
Kürdəmir Rayon İcra Hakimiyyəti başçısının aqrar məsələlər üzrə müavini Əşrəf Şükürov AZƏRTAC-ın müxbirinə bildirmişdir ki, cari ildə 28 min 534 hektar sahədən 60 min 200 ton taxıl istehsal edən torpaq mülkiyyətçiləri bu payızda əkin sahələrini 30 min hektara çatdırmaq əzmindədirlər.
Taxılçılara göstərilən dövlət qayğısı fermerləri ölkənin ərzaq təhlükəsizliyində daha fəal iştirak etməyə ruhlandırmışdır. Hazırda payızlıq taxıl səpini sürətlənir. Sahələrdə 60-dək traktor, 50 taxılsəpən texnika işləyir. Əkində əsasən yerli istehsal olan toxumlardan istifadə olunur.
Rayonun bir sıra ərazi vahidlərində, o cümlədən Karrar, Böyük Gəngərli, Pirli, Sığırlı və digər yerlərdə kütləvi taxıl səpini kampaniyası uğurla davam etdirilir.
Bölmənin digər xəbərləri
