Laçınlı məcburi köçkünlər respublikanın 58 şəhər və rayonunda səs verəcəklər
Ağcabədi, 6 fevral, Tahir Ağaməmmədov, AZƏRTAC
Laçın rayonunun ərazisi Ermənistan silahlı qüvvələrinin işğalı altında olduğu üçün seçki dairəsini əhatə edən məntəqələr respublikanın 58 şəhər və rayonunda, o cümlədən laçınlı məcburi köçkünlərin daha çox məskunlaşdıqları Ağcabədi rayonunun Taxtakörpü ərazisində fəaliyyət göstərir.
Bu barədə AZƏRTAC-ın bölgə müxbirinə 121 saylı Laçın seçki dairəsi dairə seçki komissiyasının sədri Hüseyn Səfərov bildirib. Komissiya sədrinin sözlərinə görə, dairənin tərkibinə daxil olan 102 seçki məntəqəsi üzrə 47 min 827 seçici qeydə alınıb. Seçicilərdən 1780 nəfəri ilk dəfə səs verəcək gənclərdir ki, onlardan da 105-i 18 yaşda olanlardır. Seçicilərin 1790 nəfəri 80-100 yaş arasındadır, 8 seçicinin yaşı isə 100-dən yuxarıdır. 17 saylı seçki məntəqəsində qeydə alınmış 1909-cu il təvəllüdlü Sitarə İsgəndərova rayonun ən yaşlı seçicisidir.
121 saylı Laçın seçki dairəsinin dairə və məntəqə seçki komissiyalarında fevralın 9-da ölkəmizdə keçiriləcək parlament seçkilərinə hazırlıq işləri başa çatıb və bütün seçki məntəqələri səsverməyə hazır vəziyyətə gətirilib. Seçkilərin demokratik, şəffaf və ədaləti keçirilməsi üçün bütün məntəqələrdə lazımi şərait yaradılıb. Məntəqələr zəruri texniki vasitə və metodiki vəsaitlərlə, elektrik enerjisi, rabitə şəbəkəsi və yanğın təhlükəsizliyi ilə təmin olunub. Seçicilərin öz seçimlərini sərbəst şəkildə etmələri üçün kabinələr qoyulub. Seçki məntəqələrində katib və üzvlər, habelə seçkini izləyəcək müşahidəçilər üçün yerlər müəyyənləşdirilib. Seçicilərə səsvermənin keçirilmə tarixi, vaxtı və yeri barədə bildirişlərin paylanması işi də başa çatdırılıb.
Namizədlərə seçkiqabağı təşviqat materiallarını yerləşdirmək və seçicilərlə görüşlər keçirmək üçün müvafiq yerlər ayrılıb. Dairə üzrə 9 nəfər deputatlığa namizəd qeydə alınıb. Seçkilərin gedişini izləmək üçün 1089 nəfər müşahidəçi qeydiyyatdan keçib.
Dairənin tərkibinə daxil olan 87 saylı seçki məntəqəsi Taxtakörpü qəsəbəsindəki 37 nömrəli tam orta məktəbin binasında yerləşir. Digər seçki məntəqələri kimi, bu məntəqədə də səsvermə gününə hazırlıq işləri başa çatıb.
Məntəqə seçki komissiyasının sədri Bayram Həsənov bildirib ki, dəqiqləşdirilmiş son siyahıya əsasən 1116 seçici qeydə alınıb. Onlardan 12 nəfəri seçkilərdə ilk dəfə iştirak edəcək gənclərdir. Məntəqədə seçkilərin şəffaf və demokratik keçirilməsi üçün hər cür şərait yaradılıb. Məntəqə səsvermə kabinələri, seçki qutuları ilə təmin olunub. Seçicilərə səsvermənin keçirilmə tarixi, vaxtı və yeri barədə bildirişlərin paylanması işi də başa çatdırılıb.
Bölmənin digər xəbərləri
