Latviyada fövqəladə vəziyyət rejimi müddətində ailə münaqişələrinin sayı artıb
Riqa, 4 may, AZƏRTAC
Koronavirus pandemiyası ilə əlaqədar tətbiq olunan fövqəladə vəziyyət rejimi müddətində latviyalılar ailə münaqişələri ilə bağlı polisə daha çox müraciət edirlər. Latviyada fövqəladə vəziyyət rejimi müddətində ailə münaqişələri ilə bağlı polisə şikayətlərin sayı 37 faiz artıb.
AZƏRTAC ölkənin “LETA” informasiya agentliyinə istinadla xəbər verir ki, bu barədə məlumatı Dövlət Polis İdarəsi yayıb.
Məlumatda bildirilib ki, ötən il martın 13-dən 23-dək ölkədə ailə münaqişələri ilə bağlı polisə 922 və ya günə orta hesabla 22 zəng daxil olmuşdusa, bu il həmin müddət ərzində ailə münaqişələri ilə bağlı 1445 və ya gündə orta hesabla 35 zəng qeydə alınıb.
Eyni zamanda, polisin evə gələrək aqressiv əri və ya arvadı həbs etmək hallarının sayı azalıb. Ötən il qeyd olunan dövrdə polis 94, bu il fövqəladə vəziyyət rejimi müddətində isə 60 belə qərar qəbul edib.
Qeyd edək ki, Latviya hökuməti COVID-19 virusunun yayılması ilə əlaqədar martın 12-də axşamdan etibarən fövqəladə vəziyyət rejimi elan edib. Fövqəladə vəziyyət rejiminin əvvəlcə aprelin 14-ə kimi nəzərdə tutulsa da, sonradan mayın 12-dək uzadılmasına qərar verilib.
Asiman Əsədov
AZƏRTAC-ın xüsusi müxbiri
Riqa
Bölmənin digər xəbərləri
