“LUKoyl” ŞİRKƏTİ VİTSE-PERZİDENTİNİN ATASI VƏHŞİCƏSİNƏ ÖLDÜRÜLMÜŞDÜR
Xəbər verdiyimiz kimi, dekabrın 2-də Rusiyanın “LUKoyl” neft şirkətinin vitse-prezidenti, əslən Gürcüstanın Dmanisi rayonundan olan Vahid Şərifovun atası, 79 yaşlı Sədi Şərifovun ailə üzvlərini bir dəstə silahlı quldur amansızcasına döymüş və ağsaqqalın özünü isə ona məxsus “Niva” markalı maşında naməlum istiqamətdə aparmışdır. Gürcüstan hüquq-mühafizə qurumlarının cinayətkarları tapıb Sədi kişini azad etmək səyləri istənilən nəticəni verməmişdir.
Gürcüstan DİN-də AZƏRTAC-ın müxbirinə bildirmişlər ki, dekabrın 12-də Sədi Şərifovun meyiti Bolnisi rayonundakı Akaurta kəndi yaxınlığında tapılmışdır. O, vəhşicəsinə qətlə yetirilmişdir. Daxili işlər naziri K.Narçemaşvili və Kvemo Kartli - Borçalı bölgəsinin qubernatoru Levan Mamaladze bundan xəbər tutan kimi hadisə yerinə getmiş və sonra da Dmanisi rayonunun Armudlu kəndinə gələrək Şərifovlar ailəsinə başsağlığı vermişlər.
Cinayətkarların yaxalanması üçün əməliyyat tədbirləri davam etdirilir.
Şahismayıl Məmmədov
AZƏRTAC-ın xüsusi müxbiri
Bolnisi-Tbilisi
Bölmənin digər xəbərləri
