“LUKOYL”UN VİTSE-PREZİDENTİNİN ATASINI GİROV GÖTÜRMÜŞLƏR
HADİSƏ GÜRCÜSTANIN DMANİSİ RAYONUNDA BAŞ VERMİŞDİR
Gürcüstanın Qardabani rayonundakı Candar kəndində və rayon mərkəzində baş vermiş hadisələrlə bağlı həyəcan səngiməmiş, quldurlar daha bir cinayətə əl atmışlar. Hadisə bu dəfə Dmanisi rayonundakı Armudlu kəndində baş vermişdir.
Dekabrın 1-də saat 16 radələrində maska geymiş 4 nəfər avtomatlı naməlum şəxs Rusiyanın “LUKoyl” neft şirkətinin vitse-prezidenti Vahid Şərifovun atası Sədi kişinin həyətinə soxulmuş və onu ailəsi ilə birlikdə öldürməklə hədələyərək, oğlunun guya Moskvadan göndərdiyi pulu tələb etmişdir. Quldurlar Sədi kişinin nəvəsini girov aparmaq istəmişlər. S.Şərifovun yalvar-yaxarından sonra onlar uşağı buraxıb, ağsaqqalı özləri ilə aparmışlar.
Yerli hüquq-mühafizə orqanları quldurların izinə düşmək üçün əlüstü tədbirlər görsə də, S.Şərifovun haraya aparıldığı hələlik naməlum olaraq qalır.
Gürcüstan Daxili İşlər Nazirliyindən AZƏRTAC-ın müxbirinə bildirmişlər ki, cinayətkarların axtarılıb tapılması üçün tədbirlər görülür.
Şahismayıl Məmmədov
AZƏRTAC-ın xüsusi müxbiri
Dmanisi rayonu, Armudlu kəndi.
Bölmənin digər xəbərləri
