Malidə yaşayış binasının çökməsi nəticəsində 15 nəfər ölüb
Bakı, 2 sentyabr, AZƏRTAC
Afrikanın cənub-qərbində yerləşən Malinin paytaxtı Bamakoda tikintisi başa çatmamış üçmərtəbəli binanın çökməsi nəticəsində 15 nəfərin öldüyü bildirilir.
AZƏRTAC Əl-Cəzirə telekanalının saytına istinadla xəbər verir ki, binanın dağıntıları altından 26 nəfər sağ olaraq çıxarılıb. Malinin Mülki Müdafiə Departamenti bildirib ki, qəza yerinə cəlb edilən axtarış-xilasetmə qrupunun operativ fəaliyyəti nəticəsində insanların bir çoxunu xilas etmək mümkün olub. Qeyd olunub ki, binanın çökməsi ilə bağlı cinayət işi açılıb və onun sahibi saxlanılıb.
Yerli KİV-lərin yazdığına görə, həyatını itirənlər tikintisi keyfiyyətsiz aparılan və başa çatmamış binanın birinci mərtəbəsində yaşayanlardır. Malidə bu cür halların çox olduğu, binaların əksəriyyətinin plansız və özbaşına tikildiyi də bildirilir.
Bölmənin digər xəbərləri
