Maradonanın ölümü ilə bağlı məhkəmə dinləmələri təxirə salınıb
Bakı, 21 avqust, AZƏRTAC
Argentinalı futbolçu Dieqo Maradonanın ölümü ilə bağlı məhkəmə dinləmələri tibbi sənədlərdə aşkarlanan səhvə görə bir həftə təxirə salınıb.
AZƏRTAC xəbər verir ki, bu barədə TN telekanalı məlumat yayıb.
Məhkəmə iclasının avqustun 20-də davam etdirilməsi nəzərdə tutulsa da, ölüm haqqında hesabatda səhv aşkarlandıqdan sonra hakim iclası təxirə salıb. Məlum olub ki, sənəddə futbolçunun deyil, 2015-ci ildə onun atası tərəfindən verilmiş analizlərin nəticələrindən istifadə edilib. Onun da adı Dieqo Maradona olub.
Məhkəmə sığorta şirkətinə və Maradonanın müalicə olunduğu klinikaya onun tibbi sənədləri ilə bağlı bütün materialları təqdim etməyi tapşırıb.
Qeyd edək ki, Argentina Baş Prokurorluğu 2022-ci ilin iyununda səkkiz tibb işçisini Maradonanın ölümündə səhlənkarlığa yol verməkdə ittiham edib. Təqsirləri sübuta yetirilərsə, onları 8 ildən 25 ilədək həbs cəzası gözləyir.
Dünya çempionu Dieqo Maradona 2020-ci il noyabrın 25-də 60 yaşında kəskin ürək çatışmazlığı nəticəsində vəfat edib.
Bölmənin digər xəbərləri
