Masallıda kümçülərə ipəkqurdunun paylanılmasına başlanıb
Masallı, 4 may, Bağır Əliyev, AZƏRTAC
Masallı Rayon Dövlət Aqrar İnkişaf Mərkəzinin təşkilatçılığı ilə rayona gətirilmiş 140 qutu ipəkqurdunun paylanmasına başlanıb.
AZƏRTAC-ın bölgə müxbiri xəbər verir ki, rayonun Qızılağac, Qarğalıq, Təzə Alvadı, Köhnə Alvadı, Mahmudavar, Şərəfə, Səmidxan kəndlərinin kümçüləri artıq ipəkqurdlarını əldə ediblər.
İlk ipəkqurdu toxumunu alan Qızılağac bələdiyyəsinin sədri Şamil Məmmədov bildirib ki, baramaçılıq qısa vaxtda gəlir gətirən maraqlı sahədir: “Ötən il də ipəkqurdu bəsləmişdim. Qəbul məntəqəsinə 380 kiloqram barama təhvil verdim. Bu gün 6 qutu ipəkqurdu götürmüşəm. Bu sahədə təcrübəmiz, ipəkqurdunu bəsləmək üçün yem bazamız var”.
Beş qutu ipəkqurdu alan Musaküçə kəndindən olan kümçü İntizam Quliyev deyib: “Kəndimizdə tut ağacı çoxdur. Ötən illərdə də xeyli tut tingi əkmişik. İpəkqurdlarını bəsləməkdə çətinliyimiz yoxdur. Bu məqsədlə hazırladığımız otaqlarda işlər qaydasındadır. Ötənilki uğurları artırmağa çalışacağıq”.
Qeyd edək ki, Masallı rayonunun kümçüləri ötən il qəbul məntəqəsinə 5 ton 319 kiloqram barama təhvil veriblər.
Bölmənin digər xəbərləri
