MAŞTAĞA AEROLOJİ STANSİYASI YENİDƏN İŞLƏYİR

28.11.2003 [18:21]
Çap et
A⁺ A^-

Maştağa qəsəbəsində aeroloji stansiya yenidən qurulduqdan və modernləşdirildikdən sonra noyabrın 28-də açılmışdır. Bu stansiya hələ ötən əsrin 1990-cı illərinin əvvəllərində maliyyə-iqtisadi çətinlikləri ucbatından fəaliyyətini dayandırmışdı.

Ekologiya və təbii sərvətlər naziri Hüseynqulu Bağırov açılış mərasimində çıxış edərək bildirdi ki, stansiyanın imkanları Qafqaz regionunda ilk dəfə olaraq, 40 kilometrdən artıq yüksəklikdə radiozondlama vasitəsilə atmosfer göstəricilərinin müxtəlif cəhətlərini – hərarəti, rütubəti, küləyin sürətini, atmosfer təzyiqini öyrənməyə imkan verəcəkdir. İqtisadiyyatın ayrı-ayrı sahələri üçün müxtəlif meteoroloji proqnozlar tərtib edilməsində, elmi tədqiqat işlərinin aparılmasında böyük əhəmiyyəti olan bu məlumatlar fasiləsiz olaraq Ümumdünya meteoroloji stansiyasının Qlobal telekommunikasiya sisteminə ötürüləcəkdir. Nazir dedi ki, yaxın vaxtlarda Lənkəranda analoji stansiyanın yenidən qurulmasına başlanacaqdır.

Xatırladaq ki, Gürcüstanda olan yeganə belə stansiya iqtisadi çətinliklər ucbatından işləmir, Ermənistanda isə belə stansiya,ümumiyyətlə yoxdur.