MDU-da keçirilən beynəlxalq elmi konfrans yekunlaşıb
Bakı, 18 dekabr, AZƏRTAC
Azərbaycan Respublikasının Elm və Təhsil Nazirliyinin, Mingəçevir Şəhər İcra Hakimiyyətinin və Fizika İnstitutunun dəstəyi ilə dekabrın 16-17-də Mingəçevir Dövlət Universitetində (MDU) “Yeni dövrdə təhsil və tədqiqat fəaliyyəti: reallıqlar və çağırışlar” mövzusunda keçirilən beynəlxalq elmi konfrans (ISCERA 2022) uğurla başa çatıb.
Universitetdən AZƏRTAC-a bildiriblər ki, dekabrın 17-də beynəlxalq konfransın yekun iclası keçirilib. MDU-nun akademik və inzibati heyət üzvlərinin iştirak etdiyi yekun iclasda konfransın bölmə rəhbərlərinin hesabatları dinlənilib.
Bildirilib ki, beynəlxalq elmi konfransa həm yerli, həm də xarici ali təhsil və elm ictimaiyyəti tərəfindən böyük maraq göstərilib. Bütövlükdə, 51 yerli ali təhsil və elmi-tədqiqat müəssisəsindən, eləcə də 9 xarici ölkənin 21 universitetindən ümumilikdə 520-dən artıq tezis və məqalə daxil olub. O cümlədən “İqtisad elmləri və idarəetmə” bölməsinə 105 yerli və 16 xarici olmaqla 121, “Təbiət və texnika elmləri” bölməsinə 138 yerli, 10 xarici olmaqla 148, “Təhsil və humanitar elmlər” bölməsinə 224 yerli və 36 xarici olmaqla 260 tezis və məqalə təqdim edilib. Diqqətə çatdırılıb ki, yerli və xarici universitetlərdən, elmi-tədqiqat institutlarından “İqtisad elmləri və idarəetmə” bölməsinin iclasında 14, “Təbiət və texnika elmləri” bölməsinin iclasında 15, “Təhsil və humanitar elmlər” bölməsinin iclasında 19 məruzəçi çıxış edib və təqdim edilən mövzular ətrafında maraqlı müzakirələr aparılıb.
Çıxışlarla davam edən yekun iclasda beynəlxalq konfransın uğurla başa çatmasından məmnunluq ifadə olunub.
Eyni zamanda, konfrans barədə ictimaiyyətin operativ və ətraflı məlumatlandırıldığı vurğulanıb və media dəstəyinə görə Azərbaycan Dövlət İnformasiya Agentliyinə (AZƏRTAC), “Azərbaycan müəllimi” qəzetinə, Trend Müstəqil İnformasiya Agentliyinə, “Məktəb Guşəsi” jurnalına, mi-news.az, AzEdu.az, EL TV, tehsil.biz, 7news.az, Yeniavaz və “Mingəçevir” qəzetinə təşəkkür edilib.
Bununla yanaşı, nüfuzlu xarici universitetlərin alimləri və tədqiqatçılarının da təmsil olunduqları plenar və bölmə iclaslarında aktual mövzularda təqdim edilən məruzələrin və aparılan müzakirələrin böyük maraqla qarşılandığı diqqətə çatdırılıb.
Sonda respublikanın elm və təhsil ictimaiyyəti tərəfindən müsbət qarşılanan və belə bir aktual mövzuya həsr edilən beynəlxalq konfransın davamlı keçirilməsi təklif olunub.
Qeyd edək ki, dekabrın 16-da işə başlayan beynəlxalq elmi konfrans Elm və Təhsil Nazirliyinin “Ali təhsil müəssisələrində 2022-ci ildə keçiriləcək beynəlxalq və respublika səviyyəli elmi konfrans, simpozium, forum və konqreslərin siyahısı”na əsasən təşkil olunub. Konfrans çərçivəsində açılış-plenar, plenar, bölmə və yekun iclasları keçirilib. Açılış-plenar iclasda MDU-nun rektoru Şahin Bayramov, elm və təhsil nazirinin müavini Firudin Qurbanov və digərləri çıxış ediblər. Plenar və bölmə iclaslarında elm və təhsilin inteqrasiyası, elmi tədqiqatların nəticəyönümlüyünün artırılması, təhsil və tədqiqat fəaliyyətlərində universitet-sənaye əməkdaşlığı, müxtəlif elm sahələrinin aktual problemləri, Dördüncü Sənaye İnqilabı dövründə kadr hazırlığı və tədqiqat potensialının inkişafı, müasir təhsil və innovasiyaları təşviq edən ekosistemin formalaşdırılması, Qarabağın dirçəldilməsi sahəsində tədqiqatların genişləndirilməsi və digər mövzularda məruzələr dinlənilib və müzakirələr aparılıb.
Bölmənin digər xəbərləri
