MDU və AzTU “Azərbaycan İES”də birgə elmi-praktik tədbir keçirib
Mingəçevir, 13 fevral, Vüsalə Cənnətova, AZƏRTAC
Mingəçevir Dövlət Universiteti və Azərbaycan Texniki Universitetinin (AzTU) birgə təşkilatçılığı ilə “Azərbaycan İES” MMC-də “Azərbaycanda elektrik enerjisinin tələb və təklif tarazlığı – istehsal, ötürmə və istehlakın balanslaşdırılması” mövzusunda tədbir keçirilib.
AZƏRTAC-ın bölgə müxbirinin verdiyi məlumata görə, tədbir Mingəçevir Dövlət Universiteti ilə Azərbaycan Texniki Universiteti arasında imzalanmış “Elektroenergetika tədqiqat klasteri”nin birgə yaradılması və istifadəsinə dair Strateji Əməkdaşlıq Memorandumu çərçivəsində icra olunub.
Tədbirdə Elm və Təhsil Nazirliyi yanında Təhsildə Keyfiyyət Təminatı Agentliyinin İdarə Heyətinin sədri Tural Əhmədov, Mingəçevir Dövlət Universitetinin rektoru Anar Eminov və Azərbaycan Texniki Universitetinin rektoru Vilayət Vəliyev, “AzərEnerji” ASC, “Azərbaycan İES” MMC-nin və “Mingəçevir SES” MMC-nin rəhbər və işçi heyəti, eləcə də hər iki ali təhsil müəssisəsinin əməkdaşları iştirak ediblər.
Azərbaycan Texniki Universitetinin rektoru Vilayət Vəliyevin moderatorluğu ilə keçən tədbirdə “AzərEnerji” ASC-nin İdarə Heyətinin sədrinin müşaviri Üzeyir Yusifov, “Azərbaycan İES” MMC-nin direktoru Təhmasib Hüseynov, “Mingəçevir SES” MMC-nin direktoru Oqtay Pirverdiyev, AzTU-nun prorektoru Fariz Məmmədov, Energetika fakültəsinin dekanı Hüseynqulu Quliyev, həmçinin Mingəçevir Dövlət Universitetinin müəllimi və “Azərbaycan İES” MMC-nin əməkdaşı Qədir Məmmədli təqdimatlarla çıxış ediblər.
Çıxışlarda elektrik enerjisi sistemində tələb və təklifin balanslaşdırılması, istehsal güclərinin optimallaşdırılması, ötürmə şəbəkələrinin rolu, bərpaolunan və ənənəvi enerji mənbələrinin inteqrasiyası, eləcə də universitet–sənaye əməkdaşlığının əhəmiyyəti geniş şəkildə müzakirə olunub. Qeyd edilib ki, bu cür birgə elmi-praktik tədbirlər kadr potensialının inkişafına mühüm töhfə verir.
Tədbir müzakirə ilə davam edib.
Qeyd edək ki, Mingəçevir Dövlət Universitetinin "Energetika mühəndisliyi", "Elektrik və elektronika mühəndisliyi" ixtisaslarında təhsil alan tələbələr istehsalat təcrübəsini "Azərbaycan İES" MMC-də keçirlər. Həmçinin praktiki dərslər stansiyanın istehsalat bölməsində və tədris mərkəzində təşkil olunur.
Bölmənin digər xəbərləri
