MƏCBURİ KÖÇKÜN QADINLARIN SÜLH QURUCULUĞUNDA ROLU
Qadın Problemləri üzrə Dövlət Komitəsində “Məcburi köçkün qadınların sülh quruculuğunda rolu” mövzusunda iki günlük seminar olmuşdur. Komitədən AZƏRTAC-ın müxbirinə bildirmişlər ki, qurumun sədri Zəhra Quliyeva münaqişələrin aradan qaldırılmasında, sülhün bərpa olunmasında qadınların rolunun əhəmiyyətindən danışmışdır. Natiq qeyd etmişdir ki, müharibə və münaqişələrin bütün ağırlıqlarının qadınların üzərinə düşdüyü danılmaz bir faktdır. Öz ocağı və işindən kənar düşmüş, həyat yoldaşı və oğullarını itirmiş Azərbaycan qadınları sülhü və sülh şəraitində yaşamağı qiymətləndirirlər. Biz əminik ki, münaqişənin ancaq sülh yolu ilə həlli cəmiyyətin inkişaf və tərəqqisini təmin edə bilər. Azərbaycan Respublikası Nazirlər Kabineti İşlər İdarəsinin qaçqınların, məcburi köçkünlərin problemləri və miqrasiya şöbəsinin əməkdaşı Məhəmməd Məhərrəmov qaçqın və məcburi köçkünlərin problemlərinin həlli ilə bağlı həm dövlət, həm də ölkəmizdə fəaliyyət göstərən beynəlxalq humanitar təşkilatlar tərəfindən həyata keçirilən tədbirlərdən danışmışdır. BMT-nin Qadınlar üçün İnkişaf Fondunun baş müşaviri Patrisiya Makfillips, Fondun “Qadınlar Cənubi Qafqazda münaqişələrin qarşısının alınması və sülh yaradılması uğrunda” layihəsi üzrə milli əlaqələndiricisi Gülşən Paşayeva Cənubi Qafqazın hər üç ölkəsində fəaliyyətə başlayan bu layihə çərçivəsində görülən işlər barədə məlumat vermişlər.Sonra mövzu ilə bağlı müzakirələr aparılmışdır.
Bölmənin digər xəbərləri
