Məcburi köçkünlərin İsmayıllı rayonunda salınmış yeni qəsəbəyə köçürülməsi başa çatdırılmışdır
Bakı, 11 noyabr (AZƏRTAC). Ölkəmizdəki qaçqın və məcburi köçkün probleminin həlli Azərbaycan dövləti üçün prioritet məsələdir. Prezident İlham Əliyev bununla bağlı mövqeyini açıqlayaraq bildirmişdir ki, Azərbaycan bir qarış da olsun torpağını güzəştə getməyəcək və nə qədər ki, sülh danışıqları davam edir, müxtəlif məskunlaşma obyektlərində ağır şəraitdə yaşayan məcburi köçkünlərin sosial-məişət şəraitlərinin yaxşılaşdırılması, onların məşğulluğunun təmin edilməsi üçün imkan daxilində hərtərəfli şərait yaradılacaqdır.
Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətindən AZƏRTAC-a bildirmişlər ki, ötən müddət ərzində Prezident İlham Əliyevin müvafiq Sərəncamı ilə təsdiq edilmiş Dövlət Proqramına və ona edilmiş əlavələrə uyğun olaraq məcburi köçkünlər üçün salınmış qəsəbələrin və obyektlərin açılışında ölkə başçısının iştirakı, məcburi köçkünlərlə görüşləri və birbaşa ünsiyyəti, onların qayğı və problemləri ilə yerində maraqlanması bu diqqət və qayğının bariz nümunəsidir. Bütün bunlar isə məcburi köçkünlərdə yüksək əhval-ruhiyyə, sabaha inam hissi yaratmaqla yanaşı, onların həyatında mühüm önəm daşıyır.
Təkcə bu ilin ötən dövründə Bakı Dövlət Universitetinin yataqxanalarında və Binəqədi rayonu ərazisindəki Təcili Tibbi Yardım Stansiyasının tikintisi yarımçıq qalmış binasında müvəqqəti məskunlaşmış məcburi köçkünlər Qaradağ rayonunun Müşfiqabad qəsəbəsində tikilmiş 1440 ailəlik məhəlləyə, Mingəçevir şəhərindəki istismar müddəti başa çatmış fin tipli qəsəbələrdə və məktəb binalarında məskunlaşan məcburi köçkünlər yeni salınmış 502 ailəlik məhəlləyə, Dövlət Neft Akademiyasının yataqxanalarında məskunlaşmış məcburi köçkünlər isə Abşeron rayonunun Masazır qəsəbəsində 760 ailə üçün inşa edilmiş şəhərciyə köçürülmüşdür. Bundan əlavə Qəbələ rayonunda məskunlaşmış məcburi köçkün ailələrinin Zarağan bələdiyyəsinin ərazisində 2010-cu ildə istifadəyə verilmiş 195 ailəlik məhəllədə tikilmiş daha 155 ailəlik beşmərtəbəli iki yeni yaşayış binalarına köçürülməsi də qısa müddətdə başa çatdırılmışdır.
Bu günlərdə isə İsmayıllı rayonu ərazisində yenicə istifadəyə verilmiş daha bir 45 ailəlik qəsəbəyə məktəblərdə yaşayan məcburi köçkünlərin köçürülməsi prosesi yekunlaşmışdır. Digər ərazilərdə olduğu kimi, bu qəsəbədə də mənzillər ailə tərkibinə görə və püşkatma yolu ilə paylanmışdır.
Qəsəbə su, elektrik və qazla tam təmin edilmiş, yol-küçə şəbəkəsi, yaşıllaşdırma işləri yüksək səviyyədə aparılmışdır.
Bundan başqa, ərazidə 96 yerlik məktəb binası və tibb məntəqəsi də tikilmişdir. Hər bir ailəyə 0,12 hektar həyətyanı torpaq sahəsi verilmişdir.
Ümumiyyətlə, 2001-2013-cü illər ərzində Dövlət Neft Fondundan və digər mənbələrdən ayrılmış vəsait hesabına 2,5 milyon kvadratmetr yaşayış sahəsi olan, bütün sosial-texniki infrastruktura malik 82 müasir qəsəbə salınmış, 40 min ailənin - 180 min nəfərədək qaçqın və məcburi köçkünün mənzil-məişət şəraiti yaxşılaşdırılmışdır.
Yeni evlərə köçürülən məcburi köçkünlər onlara göstərilən diqqət və qayğıya, həyat şəraitlərinin yaxşılaşdırılmasına görə Prezident İlham Əliyevə dərin minnətdarlıqların bildirirlər. Eyni zamanda qeyd edirlər ki, bura da onlar üçün müvəqqəti məskunlaşma yeridir. Amma insanın yaşaması və yaratması üçün rahat, geniş evə çox böyük ehtiyacı vardır. İndi məcburi köçkünlər də ağır şəraitdən xilas olub belə gözəl, geniş, müasir tipli, yaşayış üçün hər cür şəraitlə təmin olunmuş evlərə köçürlər. Onlar qəlbən inanırlar ki, Prezident İlham Əliyevin apardığı daxili və xarici siyasət sayəsində torpaqlarımız işğaldan azad olunacaq və hər kəs öz doğma yurduna qayıdacaqdır.
Bölmənin digər xəbərləri
