Bakı, 4 may, AZƏRTAC

Dəyişən reallıq və meydana gəlmiş yeni şərtlər mütləq olaraq konkret sahələrdə çalışan əməkdaşlarda yeni peşə səriştələrin formalaşmasını tələb edir. Yeni yanaşma və müasir peşə təfəkkürü konkret sahələrin aktuallığını qoruyub saxlamaqla yanaşı sahənin davamlı inkişafını təmin edə bilər. Bu gün dünyada müşahidə olunan pandemiya dövlətlərin davamlı inkişafının təmin olunmasında, cəmiyyətin rəqəmsal formada idarə edilməsində elmin və təhsilin əhəmiyyətini ön plana çəkmişdir. Ölkəmizdə təhsil, əlavə təhsil və onun bir istiqaməti olan ixtisasartırmanın inkişafı dövlət siyasətinin əsas prioritetlərindən biridir.

Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi öz rəqəmsal fəaliyyətini inkişaf etdirərək bu sahədə çalışan əməkdaşların təhsil səviyyəsinin yüksəldilməsinə, onlarda müasir peşə səriştələrinin, kreativ bacarıqların formalaşmasını diqqət mərkəzində saxlamış və bu məqsədlə müxtəlif təyinatlı təlimlər həyata keçirmişdir. Belə ki, ölkəmizdə yaranmış mürəkkəb vəziyyəti, əhalinin sosial təcrid dövrünü nəzərə alaraq, mərkəz tərəfindən respublikada fəaliyyət göstərən mədəniyyət müəssisələri işçiləri üçün təlimləri onlayn, elektron formatda davam etdirir.

AZƏRTAC xəbər verir ki, aprel ayı ərzində şəhər (rayon) mədəniyyət müəssisələrində çalışan əməkdaşlar üçün “Sosial izolyasiya tədbirləri çərçivəsində kitabxanaların fəaliyyət istiqamətləri”, “Evdə qal, sağlam qal, kitabla mənəvi inkişafa yol al!”, “Kitabxanalar tərəfindən oxuculara virtual oxu xidməti”, “Virtual ünsiyyət mədəniyyəti”, “Böhranlı vəziyyətdə muzeylərin fəaliyyət istiqamətləri”, “Müasir informasiya-kommunikasiya texnologiyaları vasitəsilə onlayn kitabxana-informasiya xidmətinin təşkili istiqamətləri”, “Kitabxana praktikasında innovativ kütləvi tədbirlər”, “Kitabxanalarda büdcədənkənar vəsaitlər və pullu kitabxana xidmətləri”, “Elektron Hökumət”, “Mövcud vəziyyətdə mədəniyyət fəaliyyəti subyektlərinin mədəni sərvətlərin təşviqində rolu”, “Mədəniyyət müəssisələri subyektlərinin qeyri-maddi mədəni irs nümunələrindən istifadə qaydaları”, “Muzey əşyalarının mövcud vəziyyətdə təbliği və təşviqi məsələləri”, "Virtual ekspozisiyaların təqdimatı" və s. bu kimi mövzulara həsr olunmuş təqdimat və videodərslər nümayiş edilib.

Təlimlər öncədən tərtib edilmiş və nümayiş olunmuş elektron cədvələ uyğun olaraq mərkəzin rəsmi “Facebook” səhifəsində və “YouTube” kanalında yayımlanıb. Qeyd etmək lazımdır ki, virtual təlimlər ümumilikdə 7500-dən çox izləyici tərəfindən baxılıb, 6000 izləyici tərəfindən bəyənilib və 2000-ə yaxın şərh bildirilib. Bu rəqəmlər virtual təlimlərin maraq mərkəzində olduğunun göstəricisidir.

Qeyd edək ki, mərhələli şəkildə Mərkəzləşdirilmiş Kitabxana Sisteminin müxtəlif kateqoriyalı əməkdaşları, Mədəniyyət mərkəzləri və klub müəssisələri, həmçinin Heydər Əliyev mərkəzlərinin əməkdaşları üçün də onlayn təlimlərin keçirilməsi nəzərdə tutulub. Ən fəal təlim izləyicilərinə mərkəz tərəfindən sertifikat təqdim ediləcək.