Mədəniyyət Nazirliyi “Evim – yeni iş yerim” layihəsini təqdim edir
Bakı, 14 aprel, AZƏRTAC
Dünyada COVID-19 pandemiyasının yayılması, demək olar ki, bütün ölkələrin karantin, xüsusi karantin və ya fövqəladə hal elan etməsi həyatın bütün sahələrində fövqəl davranışlar tələb edir. Bununla bağlı dövlət orqanları, özəl təşkilatlar, fərdi şəxslər öz fəaliyyət istiqamətləri üzrə çevik davranış metodlarını tətbiq etməyə başlayıb.
Ölkəmizdə də xüsusi karantin rejimi elan edildikdən sonra əmək fəaliyyətinin əsas məkanı insanların öz yaşadıqları evləri olub və tətbiq edilən çevik metodlar, internet resurslarından, mövcud texniki vasitələrdən istifadə nəticəsində həyatın bütün sahələrində fəaliyyət təmin edilib.
Xüsusi karantin dövründə Mədəniyyət Nazirliyi öz fəaliyyətini mövcud şəraitə uyğunlaşdırılmış şəkildə davam etdirir. Müxtəlif onlayn layihələr, müsabiqələr, konsertlər təşkil edilir. İdarəçilikdə mövcud texnoloji imkanlardan istifadə edilməklə mobil cihazlar, internet qəbuledicili texniki avadanlıqlar üzərindən həyata keçirilir.
Nazirlik özünün bu qəbildən olan yeni “Evim - yeni iş yerim” layihəsini elan edir.
Mədəniyyət Nazirliyindən AZƏRTAC-a bildirilib ki, layihənin məqsədi insanların ev şəraitində öz işlərini qurmasına, məsafədən idarəçiliyin metodları barədə təbliğat, maarifləndirmə işləri aparmaqla mövcud şəraitdə hər kəsi pozitiv əhval ruhiyyəyə səsləmək, ümid və optimizə dəstək olmaqdır.
Layihə çərçivəsində ilkin olaraq Mədəniyyət Nazirliyinin tabeliyində olan idarə və təşkilatların iş prinsipi, əldə etdikləri nailiyyətlər videorolik formasında nazirliyin rəsmi “facebook” səhifəsində #evimyeniişyerim həştəqi ilə nümayiş etdiriləcək. Eyni zamanda, nazirlik təşəbbüslə bağlı ictimaiyyətin nümayəndələrini, müxtəlif təşkilat və şəxsləri işlərini karantin rejimində necə qurmaları ilə bağlı videolarını hazırlamağa və sosial şəbəkələrdə #evimyeniişyerim həştəqi ilə paylaşmağa çağırır.
Öz fəaliyyətlərini ən innovativ yeniliklərlə quran, habelə paylaşılan videosu ən çox baxış sayı alan şəxslər, təşkilatlar mayın 25-dən 30-dək aparılacaq onlayn monitorinqlərdən sonra mükafatlandırılacaq.
Bölmənin digər xəbərləri
