MƏDƏNİYYƏT
Məhəmməd ağa Müctəhidzadənin əsərlərinin əlyazmaları, fotoları və bəzi sənədləri əldə edilmişdir
Bakı, 31 oktyabr (AZƏRTAC). AMEA-nın Məhəmməd Füzuli adına Əlyazmalar İnstitutu Qarabağ ədəbi mühitinin görkəmli nümayəndəsi, ictimai və din xadimi, 1910-cu ildə İstanbulda çapdan çıxmış “Riyazül-aşiqin” əsərinin müəllifi Məhəmməd ağa Müctəhidzadənin əsərlərinin əlyazmalarını, ona aid fotoları və bəzi sənədləri əldə etmişdir. Bu materialları M.Müctəhidzadənin oğlu Hafiz Sədrzadə təqdim etmişdir.
İnstitutdan AZƏRTAC-a bildirmişlər ki, əlyazmaların içində şairin Azərbaycan və fars dilində şeirləri, 1918-ci ildə bolşeviklərin və ermənilərin təcavüzü ilə bağlı Azərbaycanda cərəyan edən hadisələr, Məhəmməd ağanın bir heyətlə Türkiyəyə yardım üçün getməsi barədə xatirələri böyük maraq doğurur. Bir sənəddən məlum olur ki, M.Müctəhidzadə “Xalq xanəndələri və XIX əsr Azərbaycan musiqi alətləri” adlı əsər yazaraq 1941-ci ildə Azərbaycan Dövlət Konservatoriyası nəzdində fəaliyyət göstərən elmi-tədqiqat kabinetinin rəhbəri Bülbülə təhvil vermişdir.