MƏKTƏBDƏ “SAĞLAM HƏYAT TƏRZİ VƏ İDMAN” DEVİZİ ALTINDA TƏDBİR KEÇİRİLMİŞDİR
Bakı, 9 noyabr (AZƏRTAC). Noyabrın 9-da Bakı Şəhər Gənclər və İdman Baş İdarəsi (BŞGİBİ) tərəfindən 6 nömrəli məktəb-liseydə “Sağlam həyat tərzi və idman” devizi altında tədbir keçirilmişdir. Məktəb-liseyin direktoru Ceyran Quliyeva belə bir tədbirin bu təhsil ocağında təşkil olunduğu üçün baş idarənin rəhbərliyinə minnətdarlığını bildirmiş və məktəblilər üçün önəm kəsb etdiyini vurğulamışdır.
BŞGİBİ-nin rəisi Raqif Abbasov tədbirin mahiyyəti haqqında iştirakçıları məlumatlandırmış, uşaq və gənclərin bədən tərbiyəsi və idmana maraqlarının artırılması üçün bu cür tədbirlərin vacibliyini qeyd etmişdir.
Azərbaycan Armrestlinq (qol güləşi) Federasiyasının prezidenti Cəsarət Əhmədov, Azərbaycan Kapoeyra Federasiyasının prezidenti Taleh Orucov və Bakı Uşu Klubunun prezidenti Zahid Vəliyev rəhbərlik etdikləri federasiyaların fəaliyyəti, nailiyyətləri və idman növlərinin tarixi haqqında məlumat vermiş, hər bir növ üzrə nümunəvi çıxışlar göstərilmişdir.
Tədbirin yüksək səviyyədə keçirilməsinə göstərdiyi fəallığa görə məktəb-liseyin direktoru Ceyran Quliyeva BŞGİBİ-nin fəxri fərmanı ilə təltif olunmuşdur.
Bölmənin digər xəbərləri
