MƏRKƏZİ SEÇKİ KOMİSSİYASININ SƏDRİ SANKT-PETERBURQA SƏFƏRDƏDİR
Azərbaycan Respublikası Mərkəzi Seçki Komissiyasının sədri Məzahir Pənahov MDB-nin üzvü olan ölkələrin Parlamentlərarası Assambleyası Şurasının baş katibi M.Krotovun rəsmi dəvəti ilə bu qurumun 20-ci ümumi iclasında iştirak etmək üçün dekabrın 6-da Sankt-Peterburq şəhərinə yola düşmüşdür.
Mərkəzi Seçki Komissiyasının mətbuat xidmətindən Azərtac-a bildirmişlər ki, iclasda “MDB və Avropa dövlətlərinin qanunvericilik praktikasında beynəlxalq seçki standartlarından istifadə olunması haqqında” məsələyə baxılacaqdır. Müzakirələr zamanı “Standart seçkilər haqqında Avropa Konvensiyası layihəsi”, habelə seçki hüquqları və azadlıqları barədə rəy mübadiləsi aparılacaq, Müstəqil Dövlətlər Birliyinin seçkiləri müşahidə üzrə beynəlxalq müşahidəçiləri üçün Tövsiyyələrin layihəsi nəzərdən keçiriləcəkdir.
Məzahir Pənahov öz çıxışında respublikamızda seçkilərin və referendumun demokratik və şəffaf keçirilməsi üzrə əməli tədbirlərin tətbiqi məsələlərindən, seçki qanunvericiliyinin müstəqil seçki komissiyalarının formalaşdırılmasında və seçki kampaniyalarının uğurla başa çatdırılmasında önəmli rolundan, perspektivdə görüləcək işlərdən danışacaqdır.
İclasda Mərkəzi Seçki Komissiyası katibliyinin beynəlxalq əlaqələr şöbəsinin müdiri Rövzət Qasımov da iştirak edəcəkdir.
Bölmənin digər xəbərləri
