MİLLİ MƏCLİSDƏ GÖRÜŞ
Parlamentin sədri Azərbaycan-İran münasibətlərinin qədim tarixindən danışmış, əlaqələrimizin inkişafında dövlətlərimizin başçılarının rolunu xüsusi vurğulamışdır. Bildirmişdir ki, Azərbaycan ilə İran arasında müdafiə, iqtisadi, siyasi və mədəni əlaqələrin inkişafına dair müxtəlif sənədlər imzalanmışdır. Bu sənədlər münasibətlərimizin daha da dərinləşməsində mühüm rol oynayır.
Əlaqələrin genişlənməsində bu cür səfərlərin də mühüm rol oynadığını söyləyən Milli Məclisin sədri, hökumətlərarası müştərək komissiyanın işindən danışmış, ticarət dövriyyəsinin genişləndirilməsi üçün bütün imkanların mövcudluğunu diqqətə çatdırmışdır.
General-mayor Mustafa Məhəmməd Nəccar ölkəsinin parlament sədrinin salamlarını Oqtay Əsədova çatdırmış, bu yaxınlarda İranda baş vermiş zəlzələ ilə əlaqədar göstərilən köməyə görə, Azərbaycan Prezidentinə və xalqına minnətdarlığını bildirmişdir. Nazir qeyd etmişdir ki, ölkələrimiz arasında əlaqələrin inkişafı üçün hər cür şərait vardır. Biz bundan istifadə edərək, əlaqələrimizi daha da möhkəmlətməli və genişləndirməliyik. İnanırıq ki, bu cür səfərlər qarşıya qoyduğumuz məqsədə çatmaqda mühüm rol oynayacaqdır.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.
Görüşdə Azərbaycanın Tehrandakı səfiri Abbasəli Həsənov, İranın Bakıdakı səfiri Əfşar Süleymani və digər rəsmi şəxslər iştirak etmişlər.
Bölmənin digər xəbərləri
