MİLLİ MƏCLİSİN NÜMAYƏNDƏ HEYƏTİ QAZAXISTANDAKI AZƏRBAYCAN DİASPORUNUN ÜZVLƏRİ İLƏ GÖRÜŞMÜŞDÜR
AZƏRTAC xəbər verir ki, Milli Məclis sədrinin müavini Bahar Muradovanın rəhbərlik etdiyi nümayəndə heyəti Astanada Azərbaycan diasporunun nümayəndələri ilə görüşmüşdür.
Milli Məclisin deputatları Fəttah Heydərov və Eldar İbrahimovun da iştirak etdiyi görüşdə diaspor fəallarına ATƏT Parlament Assambleyasının Astanada keçirilmiş 17-ci sessiyası çərçivəsində Azərbaycan nümayəndə heyətinin gördüyü işlər barədə məlumat verilmişdir. B. Muradova Azərbaycanda gedən proseslərdən danışmış, Azərbaycan - Qazaxıstan arasında əməkdaşlıq və bu çərçivədə parlamentlərarası əlaqələrin səviyyəsindən bəhs etmişdir.
Azərbaycan Mədəni Mərkəzləri İttifaqının prezidenti Vidadi Salahov rəhbərlik etdiyi qurumun fəaliyyəti, Qazaxıstanda yaşayan azərbaycanlılar və onların bu ölkənin iqtisadi, siyasi və ictmai həyatındakı rolu barədə məlumat vermişdir. O bildirmişdir ki, soydaşlarımız Azərbaycanda gedən prosesləri maraqla izləyir və qazanılan uğurlara çox sevinirlər.
Soydaşlarımız Azərbaycan Prezidentinin daxili və xarici siyasətini bəyəndiklərini və dəstəklədiklərini vurğulamışlar.
Bölmənin digər xəbərləri
