MİLLİ MƏCLİSİN NÜMAYƏNDƏ HEYƏTİ UKRAYNADA
Xəbər verildiyi kimi, Milli Məclisin sədri Murtuz Ələsgərovun başçılıq etdiyi parlament nümayəndə heyəti Ukraynada rəsmi səfərdədir.
Dekabrın 3-də parlament nümayəndə heyəti Taras Şevçenko adına Kiyev Milli Universitetində olmuş, bu təhsil ocağının rektoru Viktor Skopenko ilə görüşmüşdür.
Rektor rəhbərlik etdiyi ali təhsil ocağının tarixi və strukturu haqqında ətraflı məlumat verərək bildirdi ki, 2000-ci ildə universitetə muxtariyyət statusu verilmişdir. Burada 20 mindək tələbə təhsil alır və onlara 1800 müəllim dərs deyir.
Azərbaycan parlamentinin sədri Murtuz Ələsgərov universitetlə tanışlıqdan sonra bu təhsil ocağının professor-müəllim heyəti, tələbələri və aspirantları qarşısında çıxış etdi. O, bu imkandan məmnunluq duyduğunu vurğulayaraq, belə bir görüşün səfər proqramına daxil edilməsinə görə minnətdarlığını bildirdi. Milli Məclisin sədri dedi ki, onun bütün şüurlu həyatı elmlə, Bakı Dövlət Universiteti ilə sıx bağlı olmuşdur. Hələ sovet dövründə Azərbaycanla Ukrayna arasında elm və təhsil sahəsində əlaqələr mövcud idi. Müstəqil Azərbaycanın Prezidenti Heydər Əliyevin təşəbbüsü ilə ölkələrimiz arasında tələbə mübadiləsi sayəsində azərbaycanlı tələbələr Ukraynada, ukraynalı tələbələr isə Azərbaycanın ali təhsil ocaqlarında təhsil almışlar. Bu əlaqələr indi də davam edir.
Parlamentin başçısı vurğuladı ki, ölkələrimiz arasında dostluğun ən bariz nümunəsi Ukraynada Azərbaycan diasporunun fəaliyyət göstərməsidir. Ukraynada 500 min azərbaycanlı yaşayır, Ukrayna Azərbaycanlılarının Konqresi fəaliyyət göstərir, “Azərbaycanın səsi” qəzeti çıxır. Bundan əlavə 7 bazar günü məktəbi var və onlarda Azərbaycan dili, ədəbiyyatı tədris olunur. Eyni zamanda, Bakı Slavyan Universitetində ukraynaşünaslıq ixtisası üzrə mütəxəssislər hazırlanır, Ukrayna Mədəniyyəti Mərkəzi və bazar günü məktəbləri fəaliyyət göstərir. Ölkələrimiz arasındakı münasibətlərin belə yüksək səviyyədə olmasında dövlət başçılarının böyük rolu vardır. Azərbaycan və Ukrayna müxtəlif beynəlxalq təşkilatlarda bir-birilərinin mövqelərini dəstəkləyirlər.
Milli Məclisin sədri bildirdi ki, əldə olunmuş nailiyyətlərlə bərabər, ölkəmizin Dağlıq Qarabağ problemi də vardır. Azərbaycanın ərazisinin 20 faizini Ermənistan silahlı birləşmələri işğal etmişlər. Həmin nəzarətsiz ərazilərdə terrorçu qruplar hazırlanır. Bu ərazilərdən narkotik maddələrin istehsalı və tranziti üçün istifadə olunur.
Sonra Murtuz Ələsgərov əcnəbi tələbələri maraqlandıran suallara ətraflı cavab verdi.
X X X
Həmin gün Azərbaycan parlamentinin nümayəndə heyəti Regionlararası İdarəetmə Akademiyasının Heydər Əliyevin adına Sosial Elmlər və Beynəlxalq Münasibətlər İnstitutunda oldu. Milli Məclisin sədri Murtuz Ələsgərov institutun müəllim və tələbə kollektivi qarşısında çıxış edərək, Azərbaycan-Ukrayna diplomatik əlaqələrinin tarixindən və inkişaf perspektivlərindən söhbət açdı. Spiker burada təhsil alan azərbaycanlı tələbələrlə fəxr etdiyini və Azərbaycanın gələcəyinin bilavasitə gənclərin əlində olduğunu vurğuladı.
Milli Məclisin sədri GUOAM-ın Parlament Assambleyasının yaradılmasının vacibliyindən də danışaraq dedi ki, belə bir qurumun təsis olunması təşkilata üzv ölkələrin parlamentlərarası iqtisadi və mədəni əlaqələrin daha da genişlənməsinə xidmət edəcəkdir.
Parlamentin spikeri Azərbaycanda aparılan islahatlar, Milli Məclisə seçkilərin keçirilməsi qaydaları, milli qanunvericiliyin Avropa standartlarına uyğunlaşdırılması, Dağlıq Qarabağ problemi və digər məsələlər barəsində ətraflı məlumat verdi.
Sonra çıxış edən Regionlararası İdarəetmə Akademiyasının prezidenti Georgi Şokin bildirdi ki, bu təhsil ocağı həm də Beynəlxalq Kadr Akademiyasının üzvüdür. Beynəlxalq Kadr Akademiyasının rəyasət heyətinin qərarına əsasən, Azərbaycan Respublikası Milli Məclisinin sədri Murtuz Ələsgərov səmərəli elmi-pedaqoji fəaliyyətinə və Azərbaycan-Ukrayna əməkdaşlığının inkişafındakı xidmətlərinə görə qızıl medalla təltif olunur. Medal təqdim olunduqdan sonra Azərbaycan-Ukrayna parlamentlərarası dostluq qrupunun sədri Vaqif Abdullayev Azərbaycan Dövlət Neft Şirkətinin birinci vitse-prezidenti, Milli Olimpiya Komitəsinin Prezidenti, Milli Məclisin deputatı İlham Əliyevə həsr olunmuş “O, böyük siyasətə hazırdır” kitabının nüsxələrini akademiyanın rəhbərliyinə və ölkəmizin Ukraynadakı fövqəladə və səlahiyyətli səfiri Tələt Əliyevə təqdim etdi.
X x x
Həmin gün Milli Məclisin nümayəndə heyəti Kiyev şəhəri merinin müavini Vladimir Valovoyla görüşdü. Parlamentin sədrini səmimi salamlayan cənab Valovoy bu görüşdən məmnun olduğunu bildirdi, Kiyev şəhərində sənayenin inkişafı, yeni yaşayış binalarının tikintisi, büdcənin artım sürəti və sair barədə ətraflı məlumat verdi.
Səmimi qəbula görə təşəkkürünü bildirən Milli Məclisin sədri Murtuz Ələsgərov son 50 il ərzində Kiyev şəhərinin tamamilə müasirləşdiyini və gözəlləşdiyini xüsusi vurğuladı. Söhbət zamanı Azərbaycan-Ukrayna münasibətlərinin inkişaf perspektivləri barədə fikir mübadiləsi aparıldı. Bu münasibətlərin inkişafını daha da sürətləndirəcək yeni sənədlərin imzalanmasının vacibliyi qeyd olundu.
X x x
Dekabrın 3-də Milli Məclisin nümayəndə heyətinin üzvləri ölkəmizin Ukraynadakı səfirliyinin əməkdaşları və Ukrayna Azərbaycanlıları Konqresinin fəalları ilə də görüşdülər.
Azərbaycanın Ukraynadakı səfiri Tələt Əliyev səfirliyin Azərbaycan diasporu ilə apardığı işlər barədə ətraflı məlumat verdi.
Ukraynada yarım milyonluq Azərbaycan diasporunun olduğunu vurğulayan Milli Məclisin sədri Murtuz Ələsgərov bu böyük qüvvədən səmərəli istifadə edilməsinin vacibliyini söylədi. O bildirdi ki, Prezident Heydər Əliyev səfər etdiyi bütün xarici ölkələrdə Azərbaycan diasporunun nümayəndələri ilə görüşür, onları mütəşəkkil olmağa çağırır. Hazırda dünyanın 70 ölkəsində azərbaycanlılar yaşayır və onlar Azərbaycanın haqq səsinin beynəlxalq ictimaiyyətə çatdırılması üçün var qüvvələrini sərf etməlidirlər. Azərbaycanlılar Ukraynanın ali qanunvericilik orqanında təmsil olunmaq üçün də məqsədyönlü iş aparmalıdırlar.
Ceyhun Quliyev
Milli Məclisin mətbuat
xidmətinin əməkdaşı
Bölmənin digər xəbərləri
