MİLLİ OLİMPİYA KOMİTƏSİNDƏ GÖRÜŞ KEÇİRİLMİŞDİR

14.11.2006 [14:31]
Çap et
A⁺ A^-

AZƏRTAC xəbər verir ki, noyabrın 13-də ölkəmizdə səfərdə olan Çin Xalq Respublikası Dövlət Bədən Tərbiyəsi və İdman Baş İdarəsi rəisinin müavini, Beynəlxalq Olimpiya Komitəsi İcraiyyə Komitəsinin üzvü, Çin Olimpiya Komitəsinin vitse-prezidenti Yuy Szaytsinin başçılıq etdiyi nümayəndə heyəti Azərbaycan Respublikası Milli Olimpiya Komitəsinin birinci vitse–prezidenti Çingiz Hüseynzadə ilə görüşmüşdür.

Əvvəlcə qonaq MOK-un binasında Olimpiya fotostendi ilə tanış olmuşdur.

Görüşdə Y.Szaytsin, ölkəsində 2008-ci il Yay Olimpiya Oyunlarına geniş hazırlıq işlərinin getdiyini vurğulamışdır. Olimpiadada 203 ölkənin iştirak edəcəyini vurğulayan qonaq bildirmişdir ki, Olimpiya oyunları Çin mədəniyyətini dünyaya yaymaqla yanaşı, bütün ölkələrlə sıx əlaqələrin yaradılmasına xidmət edəcəkdir.

Çingiz Hüseynzadə Olimpiya Oyunlarına hazırlığın gedişi ilə tanış olmaq üçün, gələn il Azərbaycan nümayəndə heyətinin Çinə səfər edəcəyini bildirmişdir. Azərbaycan idmançılarının Afinada keçirilən Yay Olimpiya Oyunlarında 5 medal qazanmasını xatırladan Ç.Hüseynzadə, ölkəmizdə Olimpiya hərəkatının inkişafında MOK-un prezidenti, dövlətimizin başçısı İlham Əliyevin böyük diqqət və qayğısını qonaqların diqqətinə çatdırmışdır.

Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.