“Milli” statusu daşımaq həm qürur hissidir, həm də böyük məsuliyyət
Bakı, 20 may, Fidan Əlizadə, AZƏRTAC
Yaranmasının 151-ci ildönümünü qeyd edən Azərbaycan teatr sənəti qədim və zəngin tarixi yol qət edib. Uzun və şərəfli tarixi yol keçmiş Azərbaycan teatrının inkişafında son illərdə yeni mərhələ başlayıb. Bu inkişaf özünü, ilk növbədə, teatrların maddi-texniki bazasının müasir dünya standartlarına uyğun möhkəmləndirilməsində, kollektivlərin yaradıcılıq axtarışlarının bəhrəsi olaraq yeni maraqlı tamaşaların hazırlanmasında, nüfuzlu Qərb, o cümlədən Avropa teatrları ilə təcrübə mübadiləsinin genişləndirilməsində göstərir. Ölkə başçısı tərəfindən ölkəmizdə digər sahələr kimi, mədəniyyət sahəsi, xüsusilə, incəsənətin əsas qolu olan teatrın inkişafı da daim diqqət mərkəzində saxlanılır. Bu siyasətin davamı kimi, ölkəmizdə teatrların inkişafına, bu sahənin nüfuzunun artırılmasına xidmət edən növbəti addım olaraq Nazirlər Kabineti tərəfindən Azərbaycan Dövlət Gənc Tamaşaçılar Teatrına “milli” statusu verilib. Yeni status uzun illərdir fəaliyyət göstərən, özünəməxsus sənət ənənələri olan teatrda çalışan insanların maddi rifahının yaxşılaşmasına, yaradıcılıq fəaliyyətinə böyük stimul olacaq.
Bu əlamətdar hadisə ilə bağlı Gənc Tamaşaçılar Teatrının bir neçə aktyoru öz sevincini AZƏRTAC-la bölüşüb.
Xalq artisti Yasin Qarayev deyib: “Prezident İlham Əliyevin 2003-cü ildən bu günə kimi imzaladığı bütün fərman və sərəncamları oxumuşam. Təkcə mədəniyyət və incəsənət sahəsinə dair qəbul etdiyi qərarların sayı demək olar ki, 500-ə çatıb. Bu imzalar mədəniyyət və incəsənət xadimlərinin, Azərbaycanda olan teatr binalari və kino mərkəzlərinin, muzey və tarixi abidələrin bərpası və yenidən bərpası ilə bağlı olub. Hər il mədəniyyət və incəsənət xadimlərinə fəxri adlar, mükafat və təqaüdlər verməsi, mənzillərlə təmin edilməsi, ölkə başçısınin “Mədəniyyət, ədəbiyyat, milli musiqi, ana dilimiz, tarixi keçmişimizdir”- dediyi sözlərin yazılı təsdiqidir, desəm yanılmaram”.
Xalq artisti bildirib ki, ömrünü, yaradıcılığını, səhnə fəaliyyətini bütövlükdə Gənc Tamaşaçılar Teatrı ilə bağladığından, bu sənət məbədinə “milli” statusun verilməsi onun üçün çox böyük sevindirici xəbər olub: “Düşünürəm ki, bu mənə və mənim kimi ömrünü bu sənətə bağlayan neçə-neçə sənət adamının zəhmətinə verilmiş ən böyük qiymətdir. Belə qərarlar teatra yeni nəfəs gətirir və bizləri daha böyük şövqlə çalışmağa həvəsləndirir”.
Xalq artisti Naibə Allahverdiyeva bu xəbəri tarixi hadisə kimi qiymətləndirib. “Teatr əvəzsiz sənət məbədidir. Qürur hissi duyuram ki, bu şərəfli peşəni illərdir yorulmadan, usanmadan böyük həvəslə həyata keçirirəm. Teatrlara “milli” statusunun verilməsi həqiqətən çox sevincli xəbərdir. Mən düşünürəm ki, bu tarixi hadisədir. Çünki bu il Azərbaycan Dövlət Gənc Tamaşaçılar Teatrının 96, Azərbaycan Teatrının yaranmağının 151 illiyidir. Kollektivimiz bayram əhval-ruhiyyəsindədir. Mən ölkə başçısına öz dərin minnətdarlığımı bildirirəm. Biz aktyorlar hər zaman onun qayğısını öz üzərimizdə hiss edirik”,- deyə N.Allahverdiyeva sözlərinə əlavə edib.
“Milli” statusu daşımağın böyük qürur hissi olduğunu söyləyən Əməkdar artist Şövqi Hüseynov deyib ki, bu status onlara daha böyük uğurlara imza atmağa stimul verəcək. O, bu sevincin özlüyündə böyük məsuliyyət tələb etdiyini də diqqətə çatdırıb. “Ümumiyyətlə dövlətimiz hər zaman mədəniyyətə, incəsənətə böyük diqqət və qayğı göstərib. Qəbul olunan qərar da bunu bir daha sübut edir. Azərbaycan Respublikasının Prezidenti İlham Əliyev tərəfindən ölkəmizdə digər sahələr kimi, mədəniyyət sahəsi, xüsusilə, incəsənətin əsas qolu olan teatrın inkişafı da daim diqqətdə saxlanılır. Eyni zamanda, Birinci vitse-prezident, Heydər Əliyev Fondunun prezidenti Mehriban Əliyevanın təşəbbüsü və dəstəyi ilə mədəniyyət xadimlərinin sosial şəraitinin yaxşılaşdırılması, yaradıcılıq imkanlarının genişləndirilməsi ilə bağlı mühüm işlər həyata keçirilir. Biz də çalışırıq ki, bu diqqət və qayğını yetərincə dəyərləndirib öz fəaliyyətimizlə milli teatrımızın işinə töhfələr verək”.
Bölmənin digər xəbərləri
