MƏDƏNİYYƏT
Miniatür Kitab Muzeyində “Argentina” kitabının təqdimatı keçirilmişdir
Bakı, 7 fevral (AZƏRTAC). Fevralın 7-də Miniatür Kitab Muzeyində “Argentina” kitabının təqdimat mərasimi keçirilmişdir.
AZƏRTAC xəbər verir ki, mərasimdə çıxış edən Argentinanın Azərbaycandakı səfiri Karlos Dante Riva tədbirin təşkilində əməyi olan hər kəsə təşəkkürünü bildirmişdir. Diqqətə çatdırmışdır ki, məsafə baxımından bir-birindən uzaqda yerləşən Argentina və Azərbaycan xalqlarının yaxınlaşmaları üçün daha çox iş görmək lazımdır.
Diplomat demişdir ki, təqdimatı keçirilən kitab Argentinanın Azərbaycandakı səfirliyinin təşəbbüsü, eləcə də Miniatür Kitab Muzeyinin təsisçisi və yaradıcısı, Respublika “Kitab” Cəmiyyəti idarə heyətinin sədri, Əməkdar İncəsənət Xadimi Zərifə Salahovanın böyük enerjisi və işgüzarlığı sayəsində ərsəyə gəlmişdir. Belə əməkdaşlıq bundan sonra da davam etdiriləcəkdir. Argentinanın Azərbaycandakı səfirliyi ilə Miniatür Kitab Muzeyi arasındakı sıx əməkdaşlıq hər iki ölkənin xalqlarının bir-birini yaxından tanımasına öz dəyərli töhfəsini verir.
Miniatür Kitab Muzeyinin təsisçisi və yaradıcısı, Respublika “Kitab” Cəmiyyəti idarə heyətinin sədri, Əməkdar İncəsənət Xadimi Zərifə Salahova diqqətə çatdırmışdır ki, hələ 1991-ci ilin iyun ayında qadınlardan ibarət nümayəndə heyətinin tərkibində Argentinada olarkən bu ölkə onda unudulmaz təəssürat yaratmışdır.
Vurğulamışdır ki, Argentinanın ölkəmizdəki səfirinin böyük fəallığı nəticəsində bu ölkənin Mədəniyyət və Turizm Nazirliyindən kitab üçün lazım olan materiallar qısa zaman kəsiyində təqdim edilmişdir.
İngilis dilində çap olunmuş “Argentina” miniatür kitabı ölçüsü 70x80 mm olmaqla 248 səhifədən ibarətdir. Burada 106 rəngli fotoşəkil yer almışdır. Kitabın forzasında Azərbaycan və Argentina xüsusi işarələnməklə dünya xəritəsi verilmişdir. Kitabın üzlüyü və möhkəm gümüşü cildi vardır. “İndiqo” mətbəəsində nəfis tərtibatla 100 nüsxə tirajla çap olunmuş nəşrin sponsoru “Halal-P” şirkətidir.
Mərasimdə çıxış edən Belarusun Azərbaycandakı səfiri Nikolay Patskeviç səfirliyin Miniatür Kitab Muzeyi ilə əməkdaşlığından söhbət açmışdır. Qeyd etmişdir ki, Zərifə Salahova hər dəfə Belarusda sərgi keçirərkən əsl vətənpərvər kimi Azərbaycanı böyük məhəbbətlə təbliğ edir.
Digər çıxışlarda da təqdimatı keçirilən “Argentina” kitabının əhəmiyyəti, həmçinin Miniatür Kitab Muzeyinin ayrı-ayrı ölkələrin Azərbaycandakı səfirlikləri ilə sıx əməkdaşlığı yüksək qiymətləndirilmişdir.
Daha sonra Əməkdar İncəsənət Xadimi Zərifə Salahova çıxış edərək diqqətə çatdırmışdır ki, fevralın 17-də Havana şəhərində kubalı şair Xose Martinin Miniatür Kitab Muzeyinin nəşri olan “Rozovıye tufelki” (“Los zapaticos de rosa”) kitabı təqdim ediləcəkdir. Ölçüsü 35x57 mm olan bu kitab 96 səhifədən ibarətdir. Onun 48 səhifəsi rus, 48 səhifəsi isə ispan dillərindədir. Rus dilində 8 rəngli, ispan dilində 7 rəngli şəkil yer almışdır. Kitaba çəkilmiş illüstrasiyaların müəllifi Xalq Rəssamı Arif Hüseynovdur. Superüzlüklü bu kitab “İndiqo” mətbəəsində 100 nüsxə tirajla nəşr edilmişdir.
Fevralın 20-də isə Havanada Miniatür Kitab Muzeyinin daha bir nəşri - Rikardo Qonqora Tervelin “Beş qardaş” (“Los cinco hermanos”) miniatür kitabı təqdim ediləcəkdir. İspan dilində nəşr olunmuş bu kitabın ölçüsü 45x40 mm olmaqla 16 səhifədən ibarətdir və superüzlüyə malikdir. Miniatür kitabda 4 rəngli fotoşəkil yer almışdır. Bu kitab da “İndiqo” mətbəəsində 25 nüsxə tirajla nəşr edilmişdir.
Hər iki nəşrin sponsoru “AzərİdmanServis” şirkətidir.
Diqqətə çatdırılmışdır ki, fevralın 13-dən 23-dək Havanada 34 dövlətin təmsil olunacağı Beynəlxalq kitab sərgisində Miniatür Kitab Muzeyi “Azərbaycan miniatür kitablarda və inciləri” adı altında 200-dən çox kitabla iştirak edəcəkdir. Fevralın 24-dən martın 10-dək isə Azərbaycan miniatür kitabları Havananın Xose Marti adına Milli Kitabxanasında nümayiş etdiriləcəkdir.