Misir Livana tibbi ləvazimatla dolu iki yük təyyarəsi göndərib
Qahirə, 5 avqust, AZƏRTAC
Misir Prezidenti Əbdülfəttah əl-Sisinin tapşırığına əsasən, Beyrutda baş vermiş partlayışların nəticələrini aradan qaldıran Livana tibbi ləvazimatla dolu iki yük təyyarəsi göndərilib. AZƏRTAC xəbər verir ki, bu məlumatı Misir Prezidentinin mətbuat xidməti yayıb.
Misirin Beyrutdakı səfirliyi bəyan edib ki, partlayış nəticəsində iki misirli də həlak olub. Onların cənazələri tibbi ləvazimat daşıyan təyyarələrlə Qahirəyə gətiriləcək. Bundan başqa, Beyrutdakı Misir səhra hospitalı da yaralanmış insanların müalicəsi üçün səfərbər olunub. Bu gün hospitalı ziyarət edən Misirin səfiri Yasir Elvi yaralıların vəziyyəti ilə maraqlanıb. Hospital 2006-cı ildə Livanda müharibə zamanı Misirin mərhum Prezidenti Hüsnü Mübarəkin təşəbbüsü ilə tikilib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
