Mixail Qusmanın kitabı nüfuzlu mükafata layiq görülüb
Moskva, 20 yanvar, AZƏRTAC
TASS informasiya agentliyinin baş direktorunun birinci müavini, həmyerlimiz Mixail Qusmanın “Həyat formulu: atam və anam haqqında kitab”ı “Rospeçat” şirkətinin “2017-ci ildə jurnalist tərəfindən yazılmış ən yaxşı kitab” mükafatına layiq görülüb.
AZƏRTAC TASS agentliyinə istinadla xəbər verir ki, “Rospeçat” şirkətinin rəhbəri Mixail Seslavinski mükafatı təqdim edərək bildirib ki, münsiflər heyəti bütün namizədlər içindən Mixail Qusmanın kitabını daha səmimi və lazımlı hesab edib. O deyib: “Həyat formulu: atam və anam haqqında kitab” çox səmimi və öz ailəsinə böyük məhəbbətlə yazılıb. Əsərdə XX əsrin ikinci yarısında Bakıda və SSRİ-də baş verənlər əksini tapıb. Kitabı birnəfəsə oxuyursan. Ancaq bir çatışmazlığı var ki, cəmi 2 min nüsxə ilə buraxılıb”.
Mixail Qusman mükafatı qəbul edərək deyib ki, kitabı valideynlərinin xatirəsinə ithaf edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
