MOSKVA METROSUNDA MİLİS BİLETSİZ SƏRNİŞİNİ GÜLLƏ İLƏ VURMUŞDUR
Moskva metrosu prokurorluğunun nümayəndəsi bildirmişdir ki, ilkin məlumata görə, sənədləri yoxlayarkən milis işçisi qeydiyyatı olmayan və metro stansiyasına biletsiz girməyə cəhd göstərən Rüstəm Baybekova atəş açmışdır.
Milis işçisinin özü iddia edir ki, sərnişini onunla əlbəyaxa olarkən təsadüfən güllələmişdir.
R.Baybekovun bəxti gətirmişdir: yara öldürücü olmamış, güllə kürək nahiyəsini yararaq keçmişdir. Xəstəxanada onun üzərində cərrahiyyə əməliyyatı aparılmışdır.
Metropoliten prokurorluğunun nümayəndəsi etiraf etmişdir ki, “həqiqətən, ağlasığmaz faktdır, odur ki, hadisənin başvermə şəraiti və milis işçisini silaha əl atmağa vadar edən səbəblər aydınlaşdırılır”.
