Müəllim işığı: ucqar kəndlərdə yazılan uğur hekayələri VİDEO
Salyan, 18 dekabr, İsmayıl Cəfərli, AZƏRTAC
Salyanın Çadırlı kəndində ibtidai sinif müəllimi işləyən Nigar Bağırova hər səhər ucqar kəndə dərs deməyə gedir. Şagirdləri onu məktəbin həyətində böyük sevgi ilə qarşılayır. Salyan şəhərindən xeyli uzaqda yerləşən Çadırlı kənd ümumi orta məktəbində 300-dən çox şagird təhsil alır. Onların təlim-tərbiyəsi ilə 30-a yaxın müəllim məşğul olur. Nigar Bağırova da həmin müəllimlərdəndir.
AZƏRTAC xəbər verir ki, müəllimlərin işə qəbul imtahanında yüksək nəticə toplayan Nigar müəllimə şüurlu şəkildə ucqar kənd məktəbini seçib. Deyir ki, kənddə yaşayan uşaqlara daha çox lazım olduğunu düşünüb: “Ucqar kənd müəllimi olmaq qürurvericidir. Bilirik ki, kənd məktəbi ilə şəhər məktəbi arasında fərqlər var. Mən özüm də kənd məktəbində təhsil almışam və oradakı çətinlikləri yaxşı tanıyıram. Buna görə də kənd məktəbini seçdim. Çətinliklər danılmazdır, amma əsas odur ki, xalqımın gələcəyi üçün faydalı olum. Bunun üçün kənddən başlamağı özümə daha uyğun bildim”.
Nigar müəllimə hər bir şagirdi ilə dost münasibəti qurmağa çalışdığını deyir. Onun fikrincə, hər şagird fərdi yanaşma tələb edir: “Şagirdlərin hobbiləri ilə maraqlanıram. Görürəm ki, dərsdən sonra nəyə üstünlük verirlər: kimisi rəsm çəkir, kimisi musiqi ilə məşğul olur, bəziləri riyaziyyatı, digərləri isə Azərbaycan dilini daha çox sevir. Onların daxili dünyasını açıb bu istiqamətdə yönləndirməyə çalışıram. Əsas olan hər bir uşağın özünəməxsus xüsusiyyətlərini üzə çıxarmaqdır”.
Bu dəfə isə yolumuzu Salyanın Qarabağlı kəndinə salırıq. Qarabağlı kənd 2 nömrəli tam orta məktəbin riyaziyyat müəllimi Tural Fərəcov 15 yaşında universitetə daxil olub, 20 yaşından isə riyaziyyat müəllimi kimi fəaliyyət göstərir. Valideynlərinin də riyaziyyatçı olması bu ixtisası sevərək seçməsində mühüm rol oynayıb.
Tural Fərəcov hazırda respublika fənn olimpiadalarına şagird hazırlayan uğurlu müəllimlərdəndir. Hazırladığı şagirdlər arasında öz övladları da var. Onlardan biri - Abel Fərəcov Respublika Fənn Olimpiadasında riyaziyyat üzrə qalib olaraq birinci yerə çıxıb və hazırda ADA Universitetində təhsil alır.
Tural müəllim uğurun əsas şərtinin zəhmət olduğunu vurğulayır: “2016-cı ildə ilk şagirdim - 10-cu sinif şagirdi Respublika Fənn Olimpiadasında finala yüksəldi. 2023-cü ildə övladım Abel Fərəcov bürünc medal qazandı. Həmin il iki övladım - Abel və İsmayıl Fərəcovlar Tailandda keçirilən Beynəlxalq Sinsu Olimpiadasında bir gümüş və bir qızıl medal əldə etdilər. Daha sonra Türkiyədə Türk dövlətləri arasında keçirilən olimpiadada qızıl medala layiq görüldülər”.
Əməyi dövlət tərəfindən də yüksək qiymətləndirilən Tural Fərəcov Elm və Təhsil Nazirliyi və yerli Təhsil Şöbəsi tərəfindən fəxri fərman və hədiyyələrlə təltif olunub. 2023-cü ildə elm və təhsil naziri Emin Əmirullayevin qərarı ilə “Qabaqcıl təhsil işçisi” döş nişanı, 2024-cü ildə isə “Örnək müəllim” adına layiq görülüb.
“Övladla müəllim arasında atalıq münasibətinin olması qalibiyyətə daha çox zəmin yaradır. Mən övladlarımla dost kimiyəm. Şagird bəzən müəllimdən çəkinir, amma övlad hər fikrini rahat deyir”, - deyə Tural müəllim bildirir.
Müəllim işığı həmişə parlaqdır - istər ucqar kənddə, istərsə də böyük şəhərdə. Əsas olan o işığı görmək, onu qorumaq və həmin işıqla gələcəyə yol açmaqdır.
Bölmənin digər xəbərləri
