MUĞAM TEATRINDA... “OXUYAN ÜRƏKDİ...”
Dövlət Muğam Teatrında milli musiqi ifaçılığı məktəbinin görkəmli nümayəndəsi, “Şöhrət” ordenli xalq artisti Tükəzban İsmayılovanın anadan olmasının 80 illik yubileyinə həsr edilmiş və Dövlət Teleradio Verilişləri Şirkətinin “Azərbaycantelefilm” Yaradıcılıq Birliyi tərəfindən yeni çəkilmiş “Oxuyan ürəkdir...” televiziya filminin təqdimat mərasimi keçirilmişdir. Teatrdan müxbirimizə demişlər ki, mərasimdə çıxış edənlər bildirmişlər ki, gözəl səsi və təkrarolunmaz ifa üslubu, musiqi sənətinin incəliklərini dərindən bilməsi və böyük zəhmətsevərliyi Tükəzban İsmayılovaya şöhrət gətirmişdir. Onun ifasında səslənmiş bir çox muğam və xalq mahnıları milli musiqi sənətimizin qızıl fonduna həmişəlik daxil olmuşdur. Sonra ssenari müəllifləri Yaqub Əlioğlu və Elşən Zeynallı, quruluşçu rejissor Elşən Zeynallı, operator Mətləb Yaqubov, rejissor assistenti Mikayıl Əjdəroğlunun çəkdiyi və xalq artisti Tükəzban İsmayılovanın ömür və yaradıcılıq yolunu, 65 illik səhnə fəaliyyətini canlandıran “Oxuyan ürəkdir...” televiziya filmi nümayiş etdirilmişdir. Xalq artistləri Tükəzban İsmayılova və İlhamə Quliyeva yaradıcı qrupun bütün üzvlərinə öz minnətdarlıqlarını bildirmişlər. Axırda kütləvi informasiya nümayəndələrinin iştirakı ilə mətbuat konfransı keçirilmişdir.
Bölmənin digər xəbərləri
