Bakı, 17 fevral, AZƏRTAC

Növbədənkənar Azərbaycan Respublikası Prezidenti seçkiləri Azərbaycanın ictimai-siyasi həyatında və ümumiyyətlə tariximizdə olduqca əlamətdar hadisədir. Prezident seçkilərindən sonra keçirilmiş andiçmə mərasimi və dövlət başçısı İlham Əliyevin mərasimdə çıxışı bir sıra assosiasiyalar doğurdu. Dövlət başçısının yanvarın 10-da yerli televiziya kanallarına verdiyi müsahibədə növbədənkənar seçkilərin keçirilməsi səbəbləri barədə aydın və dəqiq fikrini bildirdi və bu gün ölkə qarşısında yeni vəzifələrin durduğunu bəyan etdi: “Biz 2024-cü ilə suverenliyini tam bərpa etmiş ölkə kimi, xalq kimi başlayırıq”, dedi.

Bunu AZƏRTAC-a açıqlamasında ehtiyatda olan mayor, Qarabağ müharibəsi veteranı, hərbi ekspert Əbülfət Məhərrəmli deyib.

Ekspert xatırladıb ki, Azərbaycan Respublikası 1991-ci ildə öz müstəqilliyini bərpa etdikdən sonra Ermənistanın ərazi iddiaları və silahlı təcavüzü ilə üz-üzə qalmışdı. Azərbaycan dövlətçiliyinin mövcudluğu və müstəqil inkişafına qarşı ən böyük maneə qonşu Ermənistanın Qarabağı ələ keçirmək niyyəti idi. İlk illərdə böyük çətinliklərlə qarşılaşan xalqımız güclü ordu, vahid komandanlıq, nizam intizam olmadığına görə 90-cı illərdə düşmən havadarlarının güclü hərbi-siyasi dəstəyilə torpaqlarımızın bir qismini işğal etməyi bacarmışdı. Qarabağ probleminin həlli məsələsi 30 il müddətində Damokl qılıncı kimi xalqımızın çiyinləri üzərində asılı qalmışdı.

Vurğulamaq lazımdır ki, Ulu Öndər Heydər Əliyev hakimiyyətə qayıtdıqdan sonra həyatımızın bütün sahələrini əhatə etmiş böhran aradan qaldırıldı, Silahlı Qüvvələrdə intizamsızlığın, başıpozuqluğun qarşısı alındı, elmi əsaslarla və vahid komandanlıq prinsipi ilə idarə edilən intizamlı ordu quruculuğu prosesi başlandı.

Tariximizin qarşıya qoyduğu müşkül missiyanı yerinə yetirmək isə Heydər Əliyevin layiqli davamçısı İlham Əliyevə nəsib oldu. Prezident olduğu 20 il ərzində o, həm ölkənin iqtisadi tərəqqisini, həm də Azərbaycan Silahlı Qüvvələrinin inkişafını təmin etməyi bacardı. Prezident İlham Əliyevin hakimiyyəti illərində, ümumiyyətlə, ordu quruculuğu prioritet sahə elan edildi. Silahlı Qüvvələrimizin maddi-texniki təchizatı baxımından böyük işlər görüldü, Ordumuz dünyanın ən müasir silah və texnikası ilə təchiz edildi.

Ordumuzun regionda və dünyada qüdrətli güc strukturuna çevrildiyini döyüş meydanında sübuta yetirdi. 2016-cı ilin Aprel döyüşlərində, eləcə də 44 günlük Vətən müharibəsi dövründə Azərbaycan Ordusu nəyə qadir olduğunu döyüş meydanında düşmənə göstərdi və işğal edilmiş torpaqlarımızı azad etməyi bacardı. Bu Qələbəni Azərbaycan Prezidenti, Ali Baş Komandan İlham Əliyevin qətiyyəti, müzəffər Ordumuzun şücaəti, xalqımızın birliyi, şəhidlərimizin fədakarlığı hesabına qazandıq. Bu gün üçrəngli bayrağımız Azərbaycanın hər yerində - Şuşada, Xankəndidə dalğalanır. Yeri gəlmişkən, seçkilər günü Prezident İlham Əliyev səsini məhz Pənahəli xanın bünövrəsini qoyduğu və qurduğu şəhərdə - Xankəndidə verdi.

Müharibə günlərində Ordumuzun hərb sənətinə gətirdiyi taktiki yeniliklər bu gün dünyanın güc mərkəzlərində hərbi mütəxəssislər və ekspertlər tərəfindən diqqətlə öyrənilir.

Ən önəmlisi odur ki, Azərbaycan son bir neçə yüzillikdə itirilmiş torpaqlarını qaytarmağı bacarmış ölkəyə çevrildi. Azərbaycanın ərazi bütövlüyü bərpa edildikdən sonra ölkəmizdə tamamilə yeni ictimai-siyasi şərait formalaşdı.

İlham Əliyev andiçmə mərasimində bununla bağlı dedi: Son illərin tarixi onu göstərir ki, qarşıya qoyduğumuz bütün vəzifələr icra edildi. Əlbəttə ki, bütöv Azərbaycan bu dövrə qədəm qoymuş, bütövləşmiş birlik nümayiş etdirmiş, o cümlədən bu seçkilərdə böyük birlik nümayiş etdirmiş xalq böyük uğurlara imza atacaq.

Dövlət başçısı qarşıda duran ən vacib məsələlərdən biri kimi andiçmə mərasimində Silahlı Qüvvələrimizin gücləndirilməsi olduğunu vurğuladı.

Ötən onilliklər ərzində sülhyaratma missiyasını üzərinə götürmüş bəzi ölkələrin Vətən müharibəsi dövründə və sonra maskaları yırtıldı, onların əsl simaları üzə çıxdı. Ona görə dövlətin təhlükəsizliyinin əsas qarantı onun Silahlı Qüvvələridir.

Vətən müharibəsi bitdikdən sonra Ordumuzun təchizatı və təminatı yüksəlməkdə davam edir. 44 günlük müharibədə mühüm rol oynamış xüsusi təyinatlı qüvvələrə məxsus yeni hərbi strukturlar yaradılıb, döyüş hazırlığının artırılmasına xüsusi diqqət yetirilir.

Həyatımızın müxtəlif sahələrində qazanılmış uğurlar ilk növbədə Prezident İlham Əliyevin rəhbərliyi ilə mümkün olmuşdur. Bir daha cəmiyyətdə şəxsiyyətin rolu məsələsinə toxunmaq istərdim. Tarixdə şəxsiyyətlərin rolu barədə antik dövrdən bu yana müxtəlif fəlsəfi baxışlar mövcuddur. Azərbaycanın nümunəsində son illərdə baş vermiş hadisələr göstərdi ki, xalqın taleyində şəxsiyyətin rolu danılmazdır və İlham Əliyev tarix yaradan şəxsiyyətlərdəndir.