Bakı Enerji Həftəsi Azərbaycanın davamlı inkişafını və strateji mövqeyini nümayiş etdirir ŞƏRH
Bakı, 6 iyun, AZƏRTAC
Bildiyimiz kimi, iyunun 4-də Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz - “Caspian Oil&Gas” və 12-ci Xəzər Beynəlxalq Energetika və Yaşıl Enerji - “Caspian Power” sərgilərinin rəsmi açılış mərasimi olub. Bu tədbir Azərbaycanın qlobal enerji sektorunda əsas rolunu vurğulamaqla yanaşı, onun davamlı inkişafını və strateji mövqeyini nümayiş etdirdi. Müstəqillik yolunda mühüm çətinlikləri dəf edən Azərbaycan bu gün qlobal enerji arenasında mühüm söz sahibidir, əhəmiyyətli xarici investisiyalar cəlb edir və bərpaolunan enerji sektorunu inkişaf etdirir. Prezident İlham Əliyevin əsaslı və diplomatik notlarla zəngin nitqi tədbirin mahiyyətini daha da rəngarəng edib.
Bunu AZƏRTAC-a açıqlamasında beynəlxalq əlaqələr üzrə analitik Masil Dəmirov söyləyib.
O qeyd edib ki, Azərbaycanın uğurlarının əsasını 1994-cü ildə uzunmüddətli investisiyalara və tərəfdaşlıqlara yol açan “Əsrin müqaviləsi”nin imzalanması təşkil etdi. Bu gün Azərbaycan bir çox ölkələri təbii qazla təmin etməklə yanaşı, həm də Günəş və külək enerjisini fəal şəkildə inkişaf etdirir. 2024-cü ildə qaz ixracının 24 milyard kubmetrdən çox olacağı proqnozlaşdırılır ki, bu da onun regionun və dünyanın enerji təhlükəsizliyi üçün əhəmiyyətini vurğulayır.
“Prezident İlham Əliyevin rəhbərliyi ilə beynəlxalq aləmdə öz mövqelərini möhkəmləndirən Azərbaycan sabit və uzunmüddətli əməkdaşlıqda maraqlı olan ölkələr, şirkətlər üçün etibarlı tərəfdaşa çevrilib. Bakı Enerji Həftəsinin uğurla keçirilməsi və BƏƏ-dən “Masdar” kimi tərəfdaşların cəlb olunması ölkənin yüksək etimadından və strateji əhəmiyyətindən xəbər verir. Azərbaycan ətraf mühitin transformasiyasına sadiqliyini nümayiş etdirir ki, bu da onu beynəlxalq ekoloji təşəbbüslər üçün cəlbedici edir”, - deyə M.Dəmirov vurğulayıb.
O bildirib ki, İkinci Qarabağ müharibəsi zamanı nümayiş etdirilən hərbi güc və ardıcıl diplomatik səylər Azərbaycanın öz maraqlarını qorumağa və mövqelərini möhkəmləndirməyə hazır olduğunu göstərir. İqtisadi müstəqillik və diversifikasiya xarici iqtisadi təzyiqlərə qarşı həssaslığın azaldılmasında və daxili dayanıqlığın gücləndirilməsində mühüm rol oynayır və ölkəmizi beynəlxalq sərmayədarlar üçün daha cəlbedici edir.
Masil Dəmirovun sözlərinə görə, Azərbaycana dair inkişaf üzrə proqnozlar investisiyaların və infrastrukturun inkişafının gələcək artımından xəbər verir. Ətraf mühitin transformasiyası, o cümlədən Günəş və külək enerjisi layihələri ölkənin beynəlxalq tərəfdaşlar üçün cəlbediciliyini artıracaq. Azərbaycan münaqişələrin həlli üçün konstruktiv həll yolları təklif etməklə və regionun sabitliyinə, davamlı inkişafına töhfə verən iqtisadi əməkdaşlığı təşviq etməklə regional nüfuzunu daha da gücləndirir.
“Beləliklə, Azərbaycan öz inkişaf xətti ilə həm müttəfiqlərinə, həm də düşmənlərinə aydın mövqe nümayiş etdirir. Müttəfiqlər Azərbaycana etibarlı tərəfdaş və investisiya üçün perspektivli mühit kimi baxır, düşmənlər isə ölkənin gücünü və sabitliyini nəzərə almalıdırlar. Proqnozlar göstərir ki, Azərbaycan regional sabitliyə və davamlı inkişafa töhfə verməklə dünya miqyasında öz mövqeyini bundan sonra da möhkəmləndirəcək”, - deyə M.Dəmirov əlavə edib.
Bölmənin digər xəbərləri
