Musiqi sənəti istiqaməti üzrə qabiliyyət imtahanlarına start verilib
Bakı, 1 iyul, AZƏRTAC
İyulun 1-də Bülbül adına Orta İxtisas Musiqi Məktəbində ali təhsil müəssisələrinin V ixtisas qrupuna aid musiqi sənəti istiqaməti üzrə qabiliyyət imtahanlarına başlanılıb.
Bu barədə AZƏRTAC-a Dövlət İmtahan Mərkəzindən bildirilib.
Qabiliyyət imtahanlarının məzmunu, qiymətləndirmə meyarları və qəbul proqramları haqqında məlumatlar “Abituriyent” jurnalının 2026-cı ildə çap olunan xüsusi buraxılışlarında verilib.
İmtahana gələn abituriyentlər (subbakalavrlar) özləri ilə şəxsiyyət vəsiqəsinin əslini, qabiliyyət imtahanına buraxılış vərəqəsini, proqram formasını, musiqi alətini (fortepiano aləti istisna olmaqla) və ifa edəcəyi əsərlərin notlarını mütləq gətirməlidirlər. İxtisas imtahanında abituriyent proqramı ifa etməli, ifaçılıq qabiliyyətini və səhnə mədəniyyətini nümayiş etdirməlidir. İmtahan proqramı konsertmeysterin müşayiəti ilə ifa edilməlidir. Abituriyentləri müşayiət edəcək konsertmeysterlər verilən linkə keçid edərək qeydiyyatdan keçməlidirlər.
Qabiliyyət imtahanlarının qrafiki haqqında məlumatla buradan tanış olmaq mümkündür. Qrafik mütəmadi olaraq yenilənir və digər imtahanların tarixləri də müəyyən olduqca cədvələ əlavə ediləcək.
Bölmənin digər xəbərləri
