Mütəxəssis: Qafqaz kişilərində saç tökülməyə meyillilik asiyalılara nisbətən daha çoxdur
Bakı, 9 fevral, AZƏRTAC
“Son illərdə dermatologiyanın başın tüklü hissəsinin dərisini və tüklərini öyrənən sahəsi olan trixologiya tibbi və estetik baxımdan çox aktuallaşıb. Dermatoloqlar bu istiqamətə daha çox diqqət yetirməyə başlayıblar”.
AZƏRTAC xəbər verir ki, bunu Azərbaycan Tibb Universitetinin Dermatovenerologiya kafedrasının dosenti Səbinə Əhmədova deyib.
Onun sözlərinə görə, tüklər hər bir insanın xarici görünüşünün və özünəqiymətin mühüm tərkib hissəsidir. Başın tüklü hissəsinin dərisi həm kişilərdə, həm də qadınlarda fərdiliyi əks etdirir: “Tüklərin tökülməsi, seyrəlməsi mövzusu çox genişdir. Dermatoloji müraciətlərin strukturunda tük xəstəlikləri 8 faizə çatır, lakin onların real yayılması daha yüksəkdir. Çünki xəstələrin əksəriyyəti ixtisaslaşmış həkimlərə yox, kosmetoloji mərkəzlərə müraciət edir”.
Coğrafi cəhətdən mövcud 11 iqlim qurşağından 9-u Azərbaycanın payına düşdüyünü xatırladan S.Əhmədova vurğulayıb ki, ölkəmizdə quru subtropik iqlim şəraiti üstünlük təşkil edir: “Bu fakt tüklərin strukturuna mənfi fiziki təsir göstərir. Günəş radiasiyasının orqanizmə müsbət təsiri (D vitamini qəbulu) ilə yanaşı, tüklər ultrabənövşəyi (UB) şüaların dağıdıcı təsirinə də məruz qalır. Tük özəyinin əsasını ultrabənövşəyi şüaların təsiri altında məhv olan keratin zülalı təşkil edir və nəticədə tüklərdə zülal itkisi və piqment deqradasiyası baş verir. Tüklərə bu təsir çox vaxt nəzərə alınmır, yalnız dərini UB şüalardan qorumağa üstünlük verilir. Fizioloji tük tökülməsi bütün insanlarda adətən payızda müşahidə olunur. Lakin yay mövsümündə UB şüaların başın tüklü hissəsinin dərisinə və tüklərə zərərli təsiri, tüklərin tökülməsi patoloji xarakter daşıyır. Nəticədə tüklərin kəmiyyət və keyfiyyəti kəskin şəkildə dəyişir. Tüklər intensiv şəkildə tökülür, tutqun, kövrək, cansız və quru olur”.
Həkim-dermatoloq tüklərə və baş dərisinə xüsusi qoruyucu vasitələrin tətbiqini, UB şüaların zərərli təsirlərinin qarşısını almaq üçün insolyasiyanın artırılmasını zəruri hesab edir: “Bura xüsusi nəmləndirici maskalar, yağlı yuyucu vasitələr daxildir. Fizioloji tüktökülmə və alopesiya çox geniş və mübahisəli bir mövzudur. Həm kişilər, həm də qadınlarda rast gəlinən androgenetik alopesiyadan bəhs etmək mümkündür. Əsas səbəbləri isə irsi meyillilik və hormonal pozuntulardır. Bütün keçəlləşmə hallarının 95 faizi məhz bu səbəbdən yaranır”.
Mütəxəssis bütün androgenetik alopesiya hallarının 95 faizinin irsi xarakter daşıdığını söyləyib: “Eyni zamanda, 30 yaşlı kişilər arasında hər 3 nəfərdən biri, 50 yaşında hər ikisi, 70 yaşda isə 80 faizi bu problemdən əziyyət çəkir. O cümlədən Qafqaz kişilərində saç tökülməyə meyillilik asiyalılara nisbətən daha çoxdur”.
Bölmənin digər xəbərləri
