Müxtəlif xidmət sahələri üzrə fəaliyyət göstərənlərin peşə təhsili alması zəruridir – ekspert
Bakı, 20 dekabr, AZƏRTAC
Azərbaycan təhsil sistemində peşə təhsilinə artıq xüsusi diqqət ayrılır. Yeni ixtisaslar açılır, yüksək peşə təhsili istiqamətində təhsil alanlara imtahansız ali təhsil alması üçün subbakalavr dərəcəsi verilir. Peşə təhsili əmək bazarının tələbatına uyğun olaraq, ümumi orta təhsil və tam orta təhsil bazasında müxtəlif peşələr üzrə ixtisaslı kadr hazırlığı aparılan təhsil pilləsi hesab olunur. Sevindirici hal odur ki, hazırda peşə təhsili almaq üçün hər hansı qəbul imtahanı verməyə ehtiyac yoxdur. Abituriyent orta məktəbi bitirdiyi attestat qiymətlərinin ümumi orta müvəffəqiyyət göstəricisinin (ÜOMG) nəticəsinə əsasən peşə təhsili müəssisələrinə müraciət edə bilər.
Bu fikirləri AZƏRTAC-a müsahibəsində ixtisas seçimi və karyera üzrə mütəxəssis, təhsil eksperti Ramin Nurəliyev deyib. O bildirib ki, peşə təhsili müəssisələrində müxtəlif sahələr üzrə 50-yə yaxın ixtisaslar mövcuddur: “Cəmiyyətdə təmir xidməti olaraq usta fəaliyyətindən narazı olan vətəndaşlarımız var. İstər nəqliyyat vasitəsini, istər mənzil təmirini həmin peşənin sahibinə əmanət edənlər bir müddət sonra göstərilən xidmətin yararsızlığından, yaxud da aldadıldığından şikayət edirlər. Nəzərə almaq lazımdır ki, hər bir təmir və xidmət sahəsi üzrə hər kəs işinin mütəxəssisi olanları axtarır. Amma hazırda əmək bazarında işinin mütəxəssisi olan peşə xidməti göstərənlər ilə yanaşı fırıldaqçı ustalar da mövcuddur. Qanunvericiliyin tələbinə uyğun olaraq hər bir sahibkar, yaxud da fiziki şəxs kimi fəaliyyət göstərən vətəndaş göstərdiyi xidmət növü üzrə bilik və bacarığı ilə yanaşı, həmin sahəyə uyğun təhsili də olmalıdır. Əgər hər hansı bir texniki sahə və yaxud ustalıq fəaliyyəti üzrə xidmət göstərən vətəndaş həmin peşə sahəsi üzrə təhsil almayıbsa, bu istiqamətdə xidmət göstərməsi qanunsuz hesab olunmalıdır”.
Ekspert hesab edir ki, xidmət göstərənin bilik bacarığı ilə yanaşı, həmin peşəyə aid diplomunun da olması zəruridir: “Hər il peşə təhsili müəssisələrinə qəbul həyata keçirilir. Arzuolunandır ki, həm texniki avadanlıqlar, həm də ev-məişət xidmət sahələri üzrə usta fəaliyyəti göstərənlər həmin peşə ixtisasları üzrə təhsil alsınlar. Bu, həm peşə təhsilinin qəbulunda canlanma əmələ gətirər, həm də xidmət göstərənlər ixtisaslı kadr kimi formalaşar. Beynəlxalq təcrübəyə baxdıqda da xüsusi peşə təhsili sahələri üzrə təhsil almayanlar həmin xidmət sahələrində mütəxəssis kimi işləyə bilməzlər. Onlar ya köməkçi kimi, ya da fəhlə kimi fəaliyyət göstərə bilərlər. Peşə təhsili almış ixtisaslı ustaların əmək fəaliyyəti usta dələduzluğunun da qarşısını alacaq. İstər iaşə xidmətlərində, istərsə də usta xidmətlərində vətəndaş ona xidmət göstərən ilə müqavilə bağladıqda həmin xidməti göstərən şəxsin müvafiq sahə üzrə təhsilini müəyyənləşdirmək üçün onun diplomunu tələb edə, yaxud da işə yararlılığını müəyyənləşdirə bilər. Hesab edirəm ki, bu addım peşə təhsilinin yararlılığını artırmaq, həmçinin peşəkar mütəxəssislərin xidmət göstərməsi istiqamətində ürəkaçan olacaq”.
Bölmənin digər xəbərləri
