Naxçıvan, 30 dekabr, AZƏRTAC

Naxçıvan Beynəlxalq Hava Limanında il ərzində yerli hava xətləri ilə 2 min 146 reys edilib, 308 min 249 sərnişin, 4 milyon 899 min 681 kiloqram baqaj, 912 min 629 kiloqram yük, 53 min 892 kiloqram poçt daşınıb. Beynəlxalq daşımalarda isə 140 reys həyata keçirilib. Naxçıvan-İstanbul istiqamətində 4 min 249, Naxçıvan-Moskva istiqamətində 4 min 128 sərnişin daşınıb.

AZƏRTAC-ın Naxçıvan bürosu xəbər verir ki, bu faktlar Naxçıvan Beynəlxalq Hava Limanında ilin yekunları və qarşıda duran vəzifələrə dair keçirilən iclasda səsləndirilib.

Naxçıvan Beynəlxalq Hava Limanının direktoru Mənşur Gülməmmədli iclasda çıxış edərək bildirib ki, Ali Məclis Sədrinin göstərdiyi dövlət qayğısı sayəsində hava limanı son illərdə, eləcə də 2019-cu il ərzində böyük inkişaf yolu keçib. Belə ki, bu ilin ilk yarısında muxtar respublika əhalisinə xidmətin asanlaşdırılması məqsədilə Şahbuz şəhərində müasir aviakassa binası istifadəyə verilib. Cari ildə hava limanı üçün ən vacib və səmərəli layihələrdən biri köhnə asfalt örtüklü uçuş-enmə zolağının yenidən qurulması və tikintisi olub. Uzunluğu 3300, eni 60 metr olan uçuş-enmə zolağı enmə sistemləri, işıq-siqnal sistemi, yan təhlükəsizlik, son tormozlama zolaqları, meteoroloji avadanlıqlar və digər qurğularla təmin edilib. Radiomayak qlissada sisteminin quraşdırma işləri, transformatorların yerləşdirilməsi, kabel xətlərinin çəkilişi yekunlaşmaqdadır. Yeni uçuş-enmə zolağında uçuşların təhlükəsizliyinin təmin edilməsi məqsədilə yeni quşqovucu sistemin quraşdırılması nəzərdə tutulur. TS-1 yanacağının qəbulu və səmərəli istifadəsi sahəsində də mühüm işlər görülüb, 200 min litr tutumu olan yeni qəbul çəni quraşdırılıb istismara verilib. Yanacaq-sürtkü materialları sahəsinin çökmüş və sıradan çıxmış asfalt qatı götürülüb, yeni, keyfiyyətli asfalt qatı qoyulub, əlavə olaraq bütün yol tamamilə asfaltlanıb.

Mənşur Gülməmmədli deyib ki, uçuşların təhlükəsizliyinin təmin olunması istiqamətində ayrı-ayrı xidmət sahələrinin maddi-texniki bazası möhkəmləndirilib. Aviasiya təhlükəsizlik tədbirləri çərçivəsində karqo terminalına yeni şəbəkə videoqeydedici qurğular, nəzarət buraxılış məntəqəsinə rentgen təftiş sistemi quraşdırılıb, hava limanı ərazisinə perimetr boyu 36 ən son texnologiya ilə çalışan termal kameralar quraşdırılması işləri davam etdirilir. Hava limanında, o cümlədən aviakassalarda uzunmüddətli enerji kəsintilərinin qarşısını almaq məqsədilə avtomatik işədüşən generatorlar quraşdırılıb, enerji təchizatında gərginliyi tənzimləmək üçün müxtəlif növ requlyatorlar alınaraq istismara verilib.

Diqqətə çatdırılıb ki, hava gəmilərinə qulluq, sərnişin və yükün daşınmasında xidmətin yüksək səviyyədə təşkil edilməsi, təhlükəsizlik tədbirlərinin hərtərəfli artırılması, ayrı-ayrı xidmət sahələrinin zəruri texniki vasitələrlə təmin edilməsi cari ildə qarşıya qoyulmuş ən başlıca vəzifələrdən olub.

Sonra məruzə ətrafında çıxışlar olub.