Naxçıvan, 26 yanvar, AZƏRTAC

Naxçıvan Muxtar Respublikası Ali Məclisi Sədrinin xüsusi diqqət və qayğısı sayəsində Naxçıvan Dövlət Universitetində (NDU) müasir maddi-texniki bazaya malik xüsusi binalar tikilib və ya yenidən qurularaq müəllim və tələbələrin ixtiyarına verilib. Xarici dillər fakültəsi üçün də yenidən qurulan və əsaslı sürətdə bərpa edilən binanın yaxın günlərdə istifadəyə hazır olması göstərilən diqqət və qayğının bariz nümunəsidir.

NDU-nun Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, bu barədə universitetin rektoru Elbrus İsayev 2020-ci ilin yekunlarına və qarşıda duran vəzifələrə dair keçirilən müşavirədə ətraflı danışıb.

Rektor universitetdə 2020-2021-ci tədris ilinin əvvəlində tədris planları üzrə seçmə fənlərə yenidən baxıldığını, günümüzdə aktuallıq kəsb edən yeni Robototexnika, Camışçılıq, Mikologiya və mikotoksikologiya, Naxçıvan xalçaçılıq məktəbi, Atıcılıq fənlərinin universitetin elmi şurasının müzakirəsinə çıxarıldığını və təsdiq edildiyini bildirib.

Qeyd edilib ki, universitetin Elektroenergetika mühəndisliyi ixtisasının tələbələrinin istifadəsi üçün günəş və külək enerjisi qurğusu quraşdırılıb. Memarlıq və mühəndislik fakültəsində Texniki servis mərkəzi, İnformasiya texnologiyaları ixtisasının tələbələri üçün Robototexnika fənn kabinəsi, Pedaqoji fakültədə Texnologiya və Atıcılıq Mərkəzi yaradılıb. Beynəlxalq münasibətlər və hüquq fakültəsində Diplomatiya mərkəzi, Hüquqşünaslıq ixtisasının tələbələri üçün Kriminalistika laboratoriyası və bir neçə əlavə fənn kabinələri, Tibb fakültəsində Yaşıl əczaxana yaradılıb. Universitet xəstəxananın fəaliyyəti genişlənib və ötən ilin may ayından etibarən xəstəxanada Cərrahiyyə, Laboratoriya və Göz şöbələri də fəaliyyətə başlayıb.

Bildirilib ki, xarici ölkələrdən gələn tələbələrin artım dinamikasında əldə edilən yüksək səviyyədə artım ali təhsil ocağının beynəlxalq əlaqələrinin düzgün və sistemli idarəedilməsi nəticəsində mümkün olub. Hazırda universitet xarici tələbələrin müraciəti və qəbul sayına görə ölkə üzrə öncüllüyünü qoruyur. Alman dilinin orta məktəblərdə tədrisi ilə bağlı universitet tərəfindən qaldırılan məsələ də öz həllini tapıb. 2020-2021-ci tədris ilində ilk dəfə ingilis dilində İqtisadiyyat ixtisasının tədrisinə başlanılıb.

Ali təhsil müəssisəsinin imkanlarını daha da genişləndirməklə yanaşı, innovativ layihələrin dəstəklənməsi və keyfiyyətli kadr hazırlığına son dərəcə böyük təsir imkanlar verəcək Texnologiyalar Parkının yaradılması universitet tarixi üçün ötən ilin ən önəmli yeniliyi sayıla bilər.

Rektor qeyd edib ki, universitetdə 10 fakültə, Magistratura mərkəzi, Xarici tələbələrlə iş üzrə dekanlıq fəaliyyət göstərir. Universitetin bakalavr pilləsində 63 ixtisas üzrə yüksək ixtisaslı mütəxəssislər hazırlanır. Ali təhsil ocağında kadr hazırlığı ilə 453 nəfər professor müəllim heyəti məşğul olur ki, onlardan da 3 nəfəri AMEA-nın müxbir üzvü, 21-i elmlər doktoru, 155-i fəlsəfə doktoru, 13-ü professor, 124-ü dosent, 149-u baş müəllim, 168-i isə müəllimdir. 2020-2021-ci tədris ilində ali təhsil ocağına 32 nəfər yeni müəllim işə qəbul edilib.

Ən uğurlu məsələlərdən biri də 2020-ci ildə universitetin İncəsənət fakültəsi ixtisaslarının Türkiyə Cümhuriyyəti yeni tələbə qəbulu planına daxil edilməsi olub.

Ali təhsil ocağında bakalavr, magistratura, doktorantura pillələri və rezidentura üzrə kadr hazırlığının həyata keçirildiyini diqqətə çəkən rektor vurğulayıb ki, hazırda bakalavriat səviyyəsi üzrə 63 ixtisasda 5639, magistratura üzrə 76 ixtisaslaşmada 355, doktoranturada 60 ixtisasda 138, rezidentura üzrə 24 ixtisasda 52 nəfər olmaqla, ümumilikdə, 6 min 184 nəfər təhsil alır. Bakalavr pilləsində 700, magistraturada 5 nəfər, o cümlədən hazırlıq şöbəsində 312 əcnəbi tələbə təhsil alır. Əcnəbi tələbələr Türkiyə, İran, Banqladeş, Nigeriya, Pakistan, Özbəkistan, Rusiya, İraq, Cənubi Koreya vətəndaşlarıdır. Ali Məclis Sədrinin xüsusi tapşırığı ilə muxtar respublikada təhsil alan və dünyada yayılmış koronavirus pandemiyasına görə ölkələrinə gedə bilməyən əcnəbi tələbələrə vaxtaşırı olaraq ərzaq payı, maddi yardım təqdim olunub.

Bildirilib ki, 2020-2021-ci tədris ili üçün universitetin qəbul planı 1200 tələbə olaraq təsdiqlənib. Qəbul imtahanlarının nəticəsində 971 əyani, 113 qiyabi şöbəyə qəbul olmaqla, ümumilikdə, universitetə 1084 tələbə qəbul olub. Bununla da qəbul planı 90,3 faiz yerinə yetirilib. Tələbələrdən 189 nəfəri 500-dən yuxarı balla universitetə qəbul olub ki, onlardan da 12 nəfəri 600-dən çox bal toplayıb. Magistratura təhsil səviyyəsi üzrə keçirilən qəbul imtahanlarında isə universitetə 66 ixtisaslaşma üzrə 207 nəfər magistr qəbul olub.

Elbrus İsayev bildirib ki, tədris ilinin əvvəlində 155 nəfərdən ibarət universitetin elmi dərəcəsi olan əməkdaşlarının muxtar respublikanın ümumtəhsil məktəblərindəki nümunəvi dərslərdə iştirakının qrafiki təsdiq edilib və əməkdaşların bu dərslərdə iştirakı təmin edilib. Universitetdə yerli və xarici mütəxəssislərin iştirakı ilə ustad dərslərin keçirilməsi də il ərzində davam etdirilib. Ötən il ərzində 3 monoqrafiya, 15 dərs vəsaiti və 35 proqram və metodik göstəriş universitet elmi şurasının müzakirəsinə çıxarılıb. Bu il kitabxanaya 300 adda, 564 sayda çap materialı daxil olub ki, bunlardan da 436-ı Azərbaycan dilində, 128-i isə xarici dillərdədir.

“Azərbaycan Respublikası Prezidentinin 2018-ci il 26 sentyabr tarixli Sərəncamı ilə təsdiqlənən “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nın icrası çərçivəsində həyata keçirilən “Smart” tələbə kartları layihəsinin ilk mərhələsi universitetdə uğurla reallaşdırılıb və I kurs tələbələri “Smart” kartlarla təmin olunub”, - deyən rektor qeyd edib ki, hazırda universitet 42 kafedradan ibarət elmi-təşkilati struktura malikdir. Kafedra əməkdaşları 2016-2020-ci illər üçün Universitet Elmi Şurası tərəfindən təsdiq olunmuş layihəyə əsasən 16 elmi istiqamətlər üzrə elmi-tədqiqat işləri yerinə yetirirlər. Hesabat dövründə ali təhsil ocağında 2 beynəlxalq, 6 respublika səviyyəli elmi konfrans, tədqiqatçı-mütəxəssislərin elmi potensiallarının artırılması üçün dünyanın müxtəlif ölkələrindən olan nüfuzlu elm adamlarının iştirakı ilə müxtəlif mövzularda vebinar-təlimlər keçirilib. 2020-ci ildə universitet əməkdaşlarının 3 monoqrafiyası, 1 dərsliyi, 15 dərs vəsaiti, 27 metodik vəsaiti və proqramı, 307 elmi məqaləsi və 153 konfrans materialı çap olunub.

Məruzə ətrafında çıxışlar dinlənildikdən sonra qarşıya qoyulmuş vəzifələrin icrası istiqamətində görüləcək işləri diqqətə çatdırılıb.

Sonda universitetin elmi-ictimai və mədəni mühitində fəallıq göstərən müəllim və tələbələr mükafatlandırılıb.