Naxçıvan Müəllimlər İnstitutunda ibtidai sinif müəllimləri üçün ixtisasartırma təlimlərinə başlanılıb
Naxçıvan, 26 yanvar, AZƏRTAC
Müəllimlərin peşəkarlıq səviyyəsinin artırılması istiqamətində həyata keçirilən tədbirlərin davamı olaraq, yanvarın 25-dən Naxçıvan Müəllimlər İnstitutunda ibtidai sinif müəllimləri üçün ixtisasartırma təlimlərinə start verilib.
Naxçıvan Müəllimlər İnstitutundan AZƏRTAC-ın Naxçıvan bürosuna bildirilib ki, bu münasibətlə Naxçıvan Muxtar Respublikası Təhsil Nazirliyi və Naxçıvan Müəllimlər İnstitutunun birgə təşkilatçılığı ilə “Ümumtəhsil məktəblərinin ibtidai siniflərində pedaqoji və psixoloji işin təşkilinin müasir tələbləri” mövzusunda konfrans keçirilib.
Konfransda İnstitutun rektoru Azad Novruzov çıxış edərək muxtar respublikada təhsilin keyfiyyətinin yüksəldilməsi istiqamətində görülən işlərdən danışıb. Bildirib ki, Naxçıvan Müəllimlər İnstitutu müstəqilliyimizi bərpa etdikdən sonra yaradılıb, daim dövlət qayğısı ilə əhatə olunub. İnstitutda bakalavr, magistr, doktorantura səviyyələri üzrə kadr hazırlığı ilə yanaşı, muxtar respublikada diplomdan sonrakı təhsilin istiqamətləri üzrə də məqsədyönlü işlər aparılır. Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamına uyğun olaraq, pedaqoji profilli ixtisaslar Naxçıvan Muxtar Respublikası Təhsil Nazirliyinə hamiliyə verilib, müəllim kadrların hazırlanmasında Naxçıvan Muxtar Respublikası Təhsil Nazirliyi ilə sıx əlaqələr yaradılıb, müəllim kadrların ilkin və diplomdan sonrakı təhsilində mühüm müsbət nəticələr əldə olunub.
İnstitutun rektoru bildirib ki, diplomdan sonrakı təhsil prosesində peşəkar və səriştəli müəllim hazırlığında müəllimlərin pedaqoji və psixoloji hazırlığının artırılması günün vacib tələbidir. Müasir müəllimin qarşısında duran vəzifələrin yerinə yetirilməsində elmi-metodiki, yaxud təkcə pedaqoji biliklər kifayət etmir. Hər bir müəllim həm də psixopedaqogikanı, pedaqoji psixologiyanı və psixologiyanı mükəmməl bilməlidir. Elmi-nəzəri və pedaqoji biliklərlə yanaşı, psixoloji bilikləri yüksək olan müəllim daha peşəkar müəllim hesab olunur. Elə bu səbəbdən də bir çox klassik pedaqoqlar müəllimin psixoloji biliklərə yiyələnməsinin vacibliyini dəfələrlə vurğulayıb və buna böyük əhəmiyyət veriblər.
Konfransda Naxçıvan Muxtar Respublikasının Təhsil naziri Rəhman Məmmədov muxtar respublikada təhsilə göstərilən dövlət qayğısından danışaraq bildirib ki, muxtar respublikada bütün sahələr kimi təhsilin də inkişafı diqqət mərkəzindədir. Təhsilin inkişafına göstərilən böyük diqqət və qayğının nəticəsidir ki, bu sahədə qazanılan uğurlar ildən-ilə artır. Təhsil müəssisələri üçün yeni binalar tikilir, ümumtəhsil məktəbləri ən müasir informasiya və kommunikasiya texnologiyaları ilə təmin edilir.
Qeyd olunub ki, müəllim əməyinə verilən yüksək qiymət, təhsil müəssisələrində yaradılan müasir tədris şəraiti müəllim əməyinin bəhrələrini daha da artırır, ali və orta ixtisas təhsili müəssisələrinə tələbə qəbulunda uğurlu nəticələr qazanılır. Muxtar respublikada 2019-2020-ci tədris ili də uğurlu nəticələrlə yadda qaldı, qəbul imtahanlarında yüksək nəticələr əldə edildi, məzunlardan 236-sı Naxçıvan Müəllimlər İnstitutuna qəbul oldu. Ali Məclis Sədrinin təhsilə, o cümlədən müəllimə göstərdiyi diqqətin nəticəsidir ki, bu gün ali məktəbə qəbul olunan gənclərimiz müəllim peşəsinə böyük maraq göstərirlər. Ötən tədris ilində 663 məzunun (onlardan 73-ü 500-700 arası bal toplayıb) pedaqoji profilli ixtisasa qəbul olunması bunun əyani ifadəsidir.
“Son illər muxtar respublikanın təhsil sistemində davamlı şəkildə həyata keçirilən müəllimlərin işə qəbulu imtahanları səriştəli, hazırlıqlı, yüksək motivasiyalı təhsilverənlərin ümumtəhsil müəssisələrinə gəlməsinə imkan verib. Müəllimlərin işə qəbulu prosesinin şəffaflığı, əlçatanlığı və nəticələri təhsil sistemində müsbət inkişaf dinamikasının güclənməsi, rəqabətli təhsil mühitinin formalaşması müəllim peşəsinin nüfuzunun artmasına gətirib çıxarıb”, - deyən nazir vurğulayıb ki, müəllimlərin peşəkar inkişafının yüksəldilməsi, yaradılmış müasir şəraitdən səmərəli istifadə, müəllimə dövlət qayğısı və zamanın tələbinə uyğun olaraq təhsildə yaranan yeniliklər ixtisasartırmaya ehtiyacın artmasını da zəruri edib. Təlim kurslarının əsas məqsədi müəllimlərə qabaqcıl təhsil sistemi və effektiv sinif idarəetməsi haqqında məlumat vermək, yeni qiymətləndirmə metodları ilə müəllimləri tanış etmək və onların liderlik potensialını inkişaf etdirməkdir.
Bildirilib ki, ixtisasartırma kurslarında müəllimlərə sadəcə nəzəri biliklərin verilməsi ilə kifayətlənməməli, eyni zamanda, bu nəzəriyyələrin necə tətbiq ediləcəyi, ardıcıl peşə hazırlığının davamlılığının əhəmiyyəti və məktəbdaxili və ya məktəblərarası təcrübə mübadiləsinin mexanizmi də öyrədilməlidir. Təlim kurslarının səmərəliliyini və davamlılığını təmin etmək üçün Naxçıvan Müəllimlər İnstitutu və ümumtəhsil məktəblərinin təcrübələrindən və resurslarından birgə istifadə olunacaq. Nazir bununla yanaşı, hər il ibtidai siniflərdə yeni müəllimlərin işə başlamasını əsas göstərərək bu işin davamlı olaraq aparılmasını vacib sayıb.
Konfransa Naxçıvan Müəllimlər İnstitutunun prorektoru Çapay Quliyev “İbtidai siniflərdə təlimin səmərəliliyinin artırılmasında psixoloji biliklərdən istifadə imkanları”, institutun baş müəllimi Səminə Rüstəmova isə “Pedaqoji prosesin təşkilində İKT-dən istifadənin əhəmiyyəti” mövzusunda çıxış ediblər.
Konfransdan sonra 35 ibtidai sinif müəllimi 5 günlük onlayn təlimə başlayıb.
Qeyd edək ki, təlimlər yanvarın 30-dək davam edəcək. Sonda təlimdə iştirak edən müəllimlər test vasitəsilə qiymətləndiriləcək və onlara sertifikat təqdim olunacaq.
Bölmənin digər xəbərləri
