Naxçıvanda muzey sərvətlərinin elektron məlumat bazası yaradılır
Naxçıvan, 12 avqust, AZƏRTAC
Muzeylər sənədli, maddi təsviri, incəsənət dəyərlərində ifadə olunan bəşəriyyət tarixi haqqında çox böyük sayda informasiyanı qoruyub saxlayır. Unikal fondlar, kolleksiyalar, nadir nəşrlər haqqında məlumatlar muzey əməkdaşları tərəfindən böyük qayğı ilə nəsildən-nəslə ötürülür və muzey sənədlərində toplanır.
AZƏRTAC-ın Naxçıvan bürosu xəbər verir ki, bu sözləri Naxçıvan Muxtar Respublikası Mədəniyyət Nazirliyinin təşkilatçılığı ilə muzey əməkdaşları üçün “Muzeylərdə təkrar uçotun aparılması və elektron məlumat bazasının yaradılması” mövzusunda keçirilən seminar-treninqdə nazirliyin Mədəniyyət və mədəni irs şöbəsinin müdiri Gülbuta Babayeva deyib.
Naxçıvan Dövlət Film Fondunda keçirilən seminar-treninqdə çıxış edən Gülbuta Babayeva qeyd edib ki, bu gün həmin qiymətsiz informasiyanı qoruyub saxlamaq, onun istifadə rahatlığını təmin etmək lazımdır. Muzey fondlarında qorunan bu qiymətli maddi mədəniyyət nümunələrinin uçotu və mühafizəsi xüsusi əhəmiyyətə malikdir. Naxçıvan Muxtar Respublikasının Mədəniyyət Nazirliyinin 2021-ci il 18 iyun tarixli “Naxçıvan Muxtar Respublikası Mədəniyyət Nazirliyinin tabeliyində olan muzeylərin fondlarında təkrar uçotun aparılması və muzey sərvətlərinin elektron məlumat bazasının yaradılması barədə” əmri ilə nazirliyin sistemində fəaliyyət göstərən muzeylərin fondlarında təkrar uçot aparılır və muzey sərvətlərinin elektron məlumat bazası yaradılır.
Seminar-treninqin proqramına uyğun olaraq Gülbuta Babayeva “Muzeylərdə elektron məlumat bazasının yaradılması işi”, Cəmşid Naxçıvanski Muzeyinin baş fond mühafizi-elmi işçisi Gülnaz Hüseynova isə “Muzeylərdə təkrar uçotun aparılması” mövzularında çıxış edib, bu istiqamətdə görülən işlərdən ətraflı bəhs ediblər. Qeyd olunub ki, təkrar uçot “Azərbaycan Respublikası muzey sərvətlərinin və muzey kolleksiyasının uçotu və mühаfizəsinə dаir Təlimаt”ın 123-cü və 124-cü bəndlərinə uyğun olaraq aparılır. Təkrar uçot muzey əşyasının varlığının yoxlanması, onların mühafizə vəziyyəti, həmçinin muzey əşyalarının uçotu və qeydiyyatında yol verilmiş nöqsan və çatışmazlıqların aşkar olunması və aradan qaldırılması baxımından əhəmiyyətlidir.
Muzey əşyalarının elektron məlumat bazasının yaradılması, kağız daşıyıcılarda olan məlumatların elektron daşıyıcılara köçürülməsi müasir dövrün əsas tələblərindəndir.
Tədbirin sonunda mövzu ilə bağlı iştirakçıların sualları cavablandırılıb.
Bölmənin digər xəbərləri
