NAXÇIVANLI TƏLƏBƏLƏR TÜRKİYƏDƏ

25.08.2003 [15:13]
Çap et
A⁺ A^-

Naxçıvan Dövlət Universiteti tibb fakültəsinin III-IV kurs tələbələri və onun nəzdindəki xəstəxananın həkimlərindən ibarət nümayəndə heyəti Türkiyənin Elazıq Firat Universitetinin tibb mərkəzinin xəstəxanasında bir aylıq təcrübə keçmişdir. Bu, hər iki ölkənin ali məktəbləri arasında bu ilin mart ayında bağlanmış əməkdaşlıq protokolu sayəsində mümkün olmuşdur.

Orada qazanılan biliklərin çox faydalı olduğunu və bunu öz gələcək iş fəaliyyətlərində tətbiq edəcəklərini deyən tələbələr səfərdən çox razı qaldıqlarını, bu işin təşkili üçün universitetlərin rəhbərliyinə minnətdarlıqlarını bildirmişlər.

Elazıq Firat Universitetinin rektoru, professor Feyzi Bingöl qarşılıqlı əlaqələrin inkişafı üçün rəhbərlik etdiyi təhsil ocağının üzərinə düşən vəzifələrin yerinə yetiriləcəyini, Naxçıvanda elmin və təhsilin inkişafına hər cür kömək göstəriləcəyini bildirmişdir.

Naxçıvan Dövlət Universitetinin rektoru, akademik İsa Həbibbəyli isə yaranmış qarşılıqlı əlaqələrin daha da genişləndiriləcəyini nəzərə çarpdırmışdır.

Protokola əsasən, hər il tibb fakültəsi tələbələrinin Türkiyədə təcrübə keçməsi nəzərdə tutulmuşdur.