“NEFTÇİLƏR GÜNÜ” ÜMUMXALQ BAYRAMI SƏVİYYƏSİNDƏ QEYD OLUNACAQDIR
Azərbaycan Respublikasının Dövlət Neft Şirkətindən (ARDNŞ) AZƏRTAC-a bildirmişlər ki, hər il olduğu kimi, bu il də “Neftçilər günü” peşə bayramının təntənəli şəkildə keçirilməsi məqsədi ilə müvafiq təşkilat komitəsi yaradılmışdır.
İyulun 29-da ARDNŞ-in inzibati binasında təşkilat komitəsinin ilk iclası keçirilmişdir. İclasda çıxış edən təşkilat komitəsinin sədri, ARDNŞ-in vitse-prezidenti Xaliq Məmmədov bildirmişdir ki, ölkəmizdə sentyabrın 20-də qeyd edilən neftçilərin peşə bayramı yenə də kütləvi tədbirlərlə, ümumxalq gəzintisi ilə müşayiət olunacaq, Bakının dənizkənarı Milli Parkında ARDNŞ-in ayrı-ayrı idarə və müəssisələri öz əmək nailiyyətlərini nümayiş etdirəcəklər.
İclasda “Neftçilər günü”nün daha kütləvi keçirilməsi ilə bağlı təkliflər dinlənilmiş və müzakirə olunmuşdur. Bu il neftçilərin peşə bayramının yalnız Bakıda deyil, ölkənin neft və qaz hasil edilən digər regionlarında da təntənəli surətdə qeyd olunması qərara alınmışdır. Bundan əlavə, “Neft Daşları”nda, Mərdəkanda və Sahil qəsəbəsində yerləşən müxtəlif idarə və müəssisələrdə tədbirlər keçirmək, fərqlənən neftçilərə ARDNŞ-in mükafatlarını təqdim etmək də nəzərdə tutulur.
Neftçilərin peşə bayramının ümumxalq bayramı səviyyəsində qeyd olunması məqsədi ilə müvafiq idarə və müəssisə rəhbərlərinə konkret tapşırıqlar verilmişdir.
Bölmənin digər xəbərləri
