NƏQLİYYAT VASİTƏLƏRİNİ SƏRXOŞ İDARƏ EDƏN SÜRÜCÜLƏR CİDDİ CƏZALANDIRILACAQ
Bakı şəhər dövlət yol polisi idarəsinin rəisi, polis polkovniki Həsən Şirinov ölkə Prezidentinin “Bakı şəhərində nəqliyyat sisteminin təkmilləşdirilməsi üzrə 2006-2007-ci illər üçün Tədbirlər Planı”nın təsdiq edilməsi haqqında” Sərəncamından irəli gələn vəzifələrdən danışmış, bu Sərəncama əsasən, yük maşınlarının şəhər daxilində hərəkətinin təkmilləşdirilməsi istiqamətində görülən işlər barədə məlumat vermişdir.
Qeyd edilmişdir ki, tədbirlər planına əsasən, yükgötürmə qabiliyyəti 5 tondan artıq olan nəqliyyat vasitələri istisna olmaqla, digər maşınların gündüz saatlarında şəhər mərkəzində gediş-gəlişinə yol polisi əməkdaşları tərəfindən qadağa qoyulmamalıdır.
Həsən Şirinov ötən müddətdə “Yüksək sürət təhlükə törədir” devizi ilə keçirilən təhlükəsizlik aylığının nəticələrini müşavirə iştİrakçılarının nəzərinə çatdırmış və bu kampaniyanın uğurlu nəticə verdiyini söyləmişdir. Əldə olunan müsbət nəticənin daha da artırılması üçün aprelin 15-dən mayın 15-dək “Sərxoş sürücü təhlükə mənbəyidir” devizi ilə təhlükəsizlik aylığının keçirildiyini bildirərək qeyd etmişdir ki, təkcə son bir həftə ərzində 182 sərxoş sürücü aşkarlanmışdır.
