Norveçdə kral V Haraldın dəfn mərasiminə hazırlıq işləri yekunlaşır
Stokholm, 8 sentyabr, AZƏRTAC
Norveçdə Kral V Haraldın sentyabrın 9-da keçiriləcək dəfn mərasiminə hazırlıq işləri başa çatmaq üzrədir.
AZƏRTAC xəbər verir ki, xarici ölkələrin kral ailələrinin nümayəndələrinin, dövlət başçılarının və digər yüksəkvəzifəli qonaqların Osloya gələcəkləri gözlənilir. Mərasimin təhlükəsizliyini təmin etmək üçün ölkə tarixinin ən böyük polis əməliyyatlarından biri həyata keçirilir. Bu əməliyyata hazırlıq bir neçə il ərzində aparılıb.
Norveç Xarici İşlər Nazirliyi 19 ölkənin media nümayəndələrindən akkreditasiya üçün təxminən 650 müraciət alıb.
Yerli vaxtla saat 12:00-da Kral V Haraldın cənazəsi Kral sarayından çıxarılacaq, daha sonra matəm yürüşü Oslo kafedral kilsəsinə istiqamətlənəcək. Yürüşdə Norveç kral ailəsinin üzvləri, xarici ölkələrin kral ailələrinin nümayəndələri, dövlət başçıları və digər rəsmi şəxslər iştirak edəcəklər.
Saat 13:00-da Oslo kafedral kilsəsində vida mərasimi başlayacaq. Mərasimin əvvəlində ölkə üzrə bir dəqiqəlik sükut elan ediləcək. Sükutun başlanğıcı və başa çatması üç dəfə çalınacaq zənglərlə bildiriləcək.
Mərasimi Norveç Kilsəsinin nümayəndələri keçirəcəklər. Stortinqin sədri və ölkənin Baş naziri xatirə nitqləri söyləyəcəklər. Müxtəlif dinlərin və dünyagörüşlərinin ardıcılları kralın xatirəsinə şamlar yandıracaqlar.
Mərasimdən sonra V Haraldın cənazəsi yürüşlə Akershus qalasının kilsəsinə aparılacaq. Burada qapalı mərasim keçiriləcək. Daha sonra kralın cənazəsi Norveç kral ailəsinin digər üzvlərinin dəfn olunduğu qala kilsəsinin sərdabəsinə endiriləcək.
Mərasim başa çatdıqdan sonra Kral VIII Haakon və Kraliça Mette-Marit Akershus qalasının daxili həyətinə çıxacaqlar. Yarımçıq endirilmiş bayraqlar qaldırılacaq, ikiqat kral salamı veriləcək, bir saat ərzində Norveçin bütün ərazisində kilsə zəngləri çalınacaq.
Kral V Haraldın dəfn mərasiminə bir sıra xarici ölkələrin kral ailələrinin nümayəndələri və dövlət başçıları gələcəklər. İsveç, Danimarka, Niderland, Belçika, Böyük Britaniya və Yaponiya kral ailələrinin nümayəndələri iştiraklarını təsdiqləyiblər. Bir sıra Avropa dövlətlərinin prezidentlərinin də mərasimdə iştirakı gözlənilir.
Oslo kafedral kilsəsində təxminən min yer nəzərdə tutulub. Mərasimə, həmçinin Stortinqin bütün deputatları, Sami parlamentinin nümayəndələri, region rəhbərləri, gənclər siyasi təşkilatlarının liderləri, dini icmaların, işəgötürən təşkilatların və həmkarlar ittifaqlarının, eləcə də ictimai təşkilatların nümayəndələri dəvət olunublar.
Dəfn mərasiminin təhlükəsizliyini təmin etmək üçün Norveçin bütün ərazisindən təxminən 3500 polis əməkdaşı Osloda səfərbər edilib. Bu, Norveç polisində silah gəzdirmək icazəsi olan əməkdaşların təxminən yarısını təşkil edir. Bazar ertəsi təxminən 600 polis əməkdaşı xüsusi təlimatlandırma üçün Oslodakı mehmanxanalardan birində toplaşıb. Polis direktoru Hokon Skulstad bildirib ki, qarşıdakı əməliyyat Norveç polisi tarixində ən böyük əməliyyata çevrilə bilər.
Bölmənin digər xəbərləri
