NOVOSİBİRSK ALİMLƏRİ ERAMIZDAN ƏVVƏL III ƏSRƏ AİD MONQOLUSTANDA QƏBİRDƏ AŞKAR EDİLMİŞ TAPINTILARI ÖYRƏNİRLƏR

16.12.2006 [17:37]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Novosibirsk alimləri Monqolustanda tapılan eramızdan əvvəl III əsrə aid qəbirdə aşkar edilmiş materialların bərpası və öyrənilməsi ilə məşğuldurlar.

Rusiya Elmlər Akademiyasının Sibir bölməsi Arxeologiya və Etnoqrafiya İnstitunun elmi iş üzrə direktor müavini, akademik Vyaçeslav Molodin jurnalistlərə demişdir: “Bu il Almaniya alimləri ilə birlikdə çox maraqlı tapıntı aşkara çıxarmışıq. Monqolustanda onu “Altay adamı” adlandırmışlar. Tapıntı eramızdan əvvəl III əsrə aiddir.

Tapıntılar kolleksiyasını bu yaxınlarda Ulan-Batordan gətirmişlər. Kolleksiyanın bir hissəsi Novosibirsk Arxeologiya muzeyinə gələn Monqolustan Prezidenti Nambarın Enxbayara göstərilmişdir. Hazırda bərpaçılar bu materiallar üzərində işləyirlər. Bir ildən sonra eksponatların bərpa və konservasiya olunmuş şəkildə Ulan-Batora qaytarılması və orada muzeydə nümayiş etdirilməsi nəzərdə tutulur.

Molodin bildirmişdir ki, qəbirdə dəfn edilmiş adam təxminən 30 yaşında olmuşdur. Burada döyüş silahları da tapılmışdır.