NRYTN və “Microsoft Azərbaycan” MMC arasında əməkdaşlığa dair təqdimat keçirilib YENİLƏNİB
Bakı, 29 oktyabr, Elvin Camalov, AZƏRTAC
Azərbaycan Respublikası Nəqliyyat, Rabitə və Yüksək Texnologiyalar Nazirliyi (NRYTN) və Heydər Əliyev Mərkəzinin birgə təşkilatçılığı ilə keçirilən “İnnovasiyalar həftəsi” çərçivəsində oktyabrın 29-da NRYTN və “Microsoft Azərbaycan” MMC arasında əməkdaşlığa dair təqdimat keçirilib.
AZƏRTAC xəbər verir ki, tədbirdə nəqliyyat, rabitə və yüksək texnologiyalar nazirinin birinci müavini Əli Abdullayev, “Microsoft” şirkətinin Mərkəzi və Şərqi Avropa ölkələrinin kibertəhlükəsizlik üzrə rəhbəri Dmitri Beresnev, Mərkəzi və Şərqi Avropa ölkələrində Dövlət Qurumları üzrə Biznes İnkişafı direktoru Evanqelos Xrisafidis, "Microsoft Azərbaycan" MMC-nin baş direktoru Sərxan Həşimov çıxış ediblər.
Nəqliyyat, rabitə və yüksək texnologiyalar nazirinin birinci müavini Əli Abdullayev bildirib ki, oktyabrın 26-30-da Azərbaycanda ilk dəfə olaraq Nəqliyyat, Rabitə və Yüksək Texnologiyalar Nazirliyi Heydər Əliyev Mərkəzi ilə birgə İnnovasiya Həftəsi keçirir və bu layihə çərçivəsində müxtəlif istiqamətləri əhatə edən silsilə tədbirlər davam etməkdədir. Hazırda dünyada gedən əsas inkişaf tendensiyaları daha çox İnformasiya Kommunikasiya Texnologiyalarının və Yüksək Texnologiyaların tətbiqi ilə bağlıdır. Məhz bu istiqamət Azərbaycan Respublikasının Prezidenti İlham Əliyev tərəfindən təsdiq olunan “Azərbaycan 2020: Gələcəyə Baxış” İnkişaf Konsepsiyasında öz əksini tapıb və əsas hədəflər müəyyən olunub.
Onun sözlərinə görə, innovativ inkişaf modelinin reallaşması üçün ölkəmizin iqtisadi siyasətində artıq bir neçə əsaslı addımlar atılıb, qanunvericilik bazası təkmilləşdirilib, sənaye və texnoloji parklar yaradılıb. Dünya İqtisadi Forumunun 2018-ci il üzrə “Qlobal Rəqabət-qabiliyyətlilik Hesabatı”da “İnnovativ Ekosistem” bölməsinin “Biznesin dinamikliyi” göstəricisi üzrə Azərbaycan dünyanın 140 ölkəsi arasında 31-ci yerdə, biznesə başlamaq üçün tələb olunan günlərin sayı alt-göstəricisi üzrə 17-ci, sahibkarlıq riskləri alt-göstəricisi üzrə 21-ci yerdə qərarlaşıb. Yüksək texnologiyalar, o cümlədən informasiya və kommunikasiya texnologiyaları milli innovasiya sisteminin əsas komponenti olmaqla bərabər, təhsil, səhiyyə, kənd təsərrüfatı, sosial sahələrdə də innovasiyaların tətbiqinə geniş imkanlar açır.
Ə.Abdullayev qeyd edib ki, həyata keçirilən bir sıra əhəmiyyətli layihələrdə “Microsoft” şirkəti ilə sıx əməkdaşlıq edir, dünyada öz həlləri ilə öndə olan bu şirkətin təcrübəsini ölkəmizə gətirmək üçün ardıcıl işlər aparılır. “Microsoft Azərbaycan”ın tərəfdaşlığı ilə informasiya texnologiyaları, kibertəhlükəsizlik, təhsil, əqli mülkiyyət və digər sahələrdə uğurlu layihələr həyata keçirilir. “Microsoft” şirkəti Azərbaycanda elektron imzanın istifadəsini təmin edən “Açıq Açar İnfrastrukturu”nun qurulmasında bilavasitə iştirak edib. Layihə çərçivəsində yaradılmış Milli Sertifikat Xidmətləri Mərkəzi dövlət qurumlarını, hüquqi və fiziki şəxsləri gücləndirilmiş elektron imzalarla təmin edir. Bu günədək mərkəz tərəfindən istifadəçilərə 159 mindən çox elektron imza sertifikatı təqdim olunub. Bu istiqamətdə “Microsoft”la birgə aparılan uğurlu işlərin davamı olaraq ölkəmiz üçün əhəmiyyətli növbəti innovativ layihə olan elektron imzanın yeni nəsil şəxsiyyət vəsiqələrində yerləşdirilməsinin həyata keçirilməsidir.
“Ölkəmizdə dövlət sektorunun istifadəsində olan kompüterlərin “Microsoft” şirkətinin proqram təminatı ilə lisenziyalaşdırılmasının ilk mərhələsi həyata keçirilib. Nəticədə 10 min ədəd kompüter Microsoft proqramları ilə təmin olunub. Bu əməkdaşlığın davamı olaraq dövlət qurumları üçün 20 min və təhsil müəssisələri üçün 10 min ədəd lisenziyanın alınması məqsədilə bu il iyunun 30-da nazirliyin tabeliyində fəaliyyət göstərən “AzInTelecom” müəssisəsi ilə “Microsoft” şirkəti arasında yeni “Enterprise Agreement” Sazişi imzalanıb. Bu layihənin davamlı icrası nəticəsində dövlət qurumlarında mövcud lisenziya problemlərinin ardan qaldırılması ilə kibertəhlükəsizlik, əqli mülkiyyətin və fərdi məlumatların qorunması, elektron mühitin inkişafına müsbət təsir edəcək. Bu da öz növbəsində ölkəmizin informasiya kommunikasiya texnologiyaları ilə yanaşı, ümumi iqtisadiyyatın bir sıra istiqamətlərində, o cümlədən investisiya mühiti üzrə beynəlxalq reytinqlərdə irəliləməsinə müsbət təsir edəcək”, - deyə Ə.Abdullayev vurğulayıb.
Nazirin birinci müavini bildirib ki, Nazirliyin Yüksək Texnologiyalar Parkı ilə “Microsoft Azərbaycan” arasında imzalanmış Anlaşma Memorandumuna əsasən ölkəmizdə startap ekosisteminin inkişaf edilməsi üçün bir sıra təşəbbüslər gerçəkləşdirilib. Belə ki, “Microsoft Biz-Spark” layihəsinin vasitəsilə pulsuz proqram təminatı, bulud mühiti və tədris imkanları təqdim olunub. Azərbaycan startapları bu imkanlardan bəhrələnib. Gənclərin innovasiyalara olan marağının artırılması və onların beynəlxalq startap hərəkatına qoşulması məqsədilə Azərbaycanda 2015-ci ildən etibarən hər il “Microsoft Imagine Cup” müsabiqəsi keçirilir. Qaliblərin bu nüfuzlu müsabiqənin Dünya Finalında ölkəmizi təmsil etməsinə dəstək verilir. İnformasiya texnologiyaları sahəsində bilik və bacarıqların artırılması üçün “Microsoft” Azərbaycanda “Microsoft IT Academy” proqramına başlayıb. Bu proqram vasitəsilə tədris müəssisələri fundamental texnoloji biliklərə aid rəqəmsal kontent və sertifikatlar əldə edib.
Tədbir çərçivəsində nazirliyin tabeliyindəki "İnformasiya-Kommunikasiya Texnologiyalarının Tətbiqi və Tədrisi Mərkəzi" MMC ilə "Microsoft Azərbaycan" MMC arasında "Əşyaların İnterneti" laboratoriyasının yaradılmasına dair Anlaşma Memorandumu imzalanıb.
Memorandumu “İnformasiya-Kommunikasiya Texnologiyalarının Tətbiqi və Tədrisi Mərkəzinin” direktoru Rauf Cabbarov və “Microsoft Azərbaycan” MMC-nin baş direktoru Sərxan Həşimov imzalayıb.
Bölmənin digər xəbərləri
