NYU-YORK TƏBİƏTŞÜNASLIQ MUZEYİNDƏ AZƏRBAYCANA HƏSR EDİLMİŞ BÖLMƏ OLACAQ
Komitədən verilən məlumata görə, muzeydə dünyanın bütün xalqları haqqında məlumat guşəsi olduğu halda, Azərbaycana həsr olunmuş bölmə yoxdur. Hətta türklər, İslam dünyası, Qafqaz xalqları və keçmiş SSRİ respublikalarının tarixini göstərən bölmələrdə də Azərbaycan haqqında məlumat yoxdur.
Dövlət Komitəsi muzeyin rəhbərliyi ilə danışıqlar apararaq, ilkin mərhələdə Azərbaycanla bağlı müvəqqəti sərginin təşkil olunmasına razılıq almışdır. Gələcəkdə həmin sərginin muzeydə daimi saxlanılması və genişləndirilməsi məsələsi müsbət həllini tapacaqdır. Muzeydə sərginin təşkili ölkəmizin tarixi və mədəniyyəti haqqında məlumatların dünya ictimaiyyətinə çatdırılmasında mühüm addım olacaqdır.
Bu məsələ Mədəniyyət Nazirliyi və Azərbaycan Tarixi Muzeyi ilə müzakirə edilmiş, lazımı eksponatların alınması üçün razılıq əldə olunmuşdur. Hazırda Dövlət Komitəsinin əməkdaşları müvəqqəti sərginin açılışı ilə bağlı texniki işləri yekunlaşdırmaq məqsədi ilə ABŞ-da ezamiyyətdədirlər.
