“ODLAR YURDU AZƏRBAYCAN” DİL KURSU ÜZRƏ YAY UNİVERSİTETİ FƏALİYYƏTƏ BAŞLAMIŞDIR
AZƏRTAC xəbər verir ki, iyulun 9-da Beynəlxalq Mətbuat Mərkəzində iyulun 7-dən “Odlar yurdu Azərbaycan” dil kursu üzrə yay universitetinin fəaliyyətə başlamasına həsr olunmuş tədbir keçirilmişdir.
Avropa Tələbələr Forumu Bakı İctimai Birliyinin (AEGEE-Bakı) təşkil etdiyi tədbirdə müvafiq qurumların nümayəndələri, Avropanın müxtəlif ölkələrindən tələbələr iştirak etmişlər.
Avropa Tələbələr Forumu Bakı İctimai Birliyinin prezidenti Toğrul Ələkbərov və digər natiqlər tələbə təşkilatı olan AEGEE barədə ətraflı məlumat vermiş, onun Avropanın ayrı-ayrı ölkələrində geniş fəaliyyət göstərdiyini bildirmişlər. Qeyd etmişlər ki, təşkilat tələbələrə Avropanın müxtəlif şəhərlərində keçirilən tədbirlərində iştirak etmək, avropalı gənclərlə təmasda olmaq imkanları yaradır.
Xatırladaq ki, AEGEE-Baki İctimai Birliyi Macarıstan, Slovakiya, İtaliya, İspaniya, Türkiyə və digər ölkələrdən respublikamıza gəlmiş 12 əcnəbi tələbə üçün təşkil edilmiş “Odlar yurdu Azərbaycan” dil kursu üzrə yay universiteti iyulun 21-dək davam edəcəkdir.
AEGEE-Bakı təşkilatı Azərbaycan gənclərinin Avropaya inteqrasiyasına əsaslı töhfə vermiş gənclər mübadiləsi proqramları həyata keçirmişdir.
Tədbirdə Avropa ölkələrindən olan tələbələr öz ürək sözlərini söyləmişlər.
Bölmənin digər xəbərləri
