Oğuz rayonunun Bucaq kəndində yeni tibb məntəqəsi tikilmişdir
Oğuz, 13 iyun (AZƏRTAC). Yaponiya hökumətinin “Ot kökləri və insan təhlükəsizliyi” qrant yardım proqramı çərçivəsində həyata keçirilən “Oğuz rayonunun Bucaq kəndində tibb məntəqəsinin tikintisi” layihəsi üzrə işlər artıq yekunlaşmışdır.
Rayon icra hakimiyyətindən AZƏRTAC-a bildirmişlər ki, sözügedən layihə üzrə Yaponiyanın ölkəmizdəki səfirliyi ilə “Yaddaş” İctimai Birliyi arasında bu il fevralın 6-da qrant müqaviləsi imzalanmışdır.
Layihənin məqsədi Bucaq və ətraf kəndlərdə əhaliyə göstərilən tibbi xidmətin keyfiyyətini daha da yaxşılaşdırmaqdır. Layihədən bu ərazidə yaşayan 4 min nəfərədək əhali faydalanacaqdır.
İyunun sonunda layihənin başa çatması münasibətilə Yaponiya səfirliyi nümayəndələrinin iştirakı ilə Bucaq kəndində mərasimin keçirilməsi nəzərdə tutulur.
Bölmənin digər xəbərləri
