Oğuzda payızlıq dən bitkilərinin əkin sahəsi 821 hektar artıb
Oğuz, 6 yanvar, Mustafa Dadaşov, AZƏRTAC
Oğuz rayonunun təsərrüfatlarında 2026-cı ilin məhsulu üçün payızlıq dən bitkilərinin səpini başa çatıb. Torpaq mülkiyyətçiləri kampaniya dövründə 17 min 138 hektar sahəyə toxum səpiblər. Taxıl əkinlərinin 9 min 833 hektarını buğda, 7 min 305 hektarını arpa sahələri təşkil edir. Payızlıq dənlilərin əkin sahəsi əvvəlki illə müqayisədə 821 hektar artıb. Səpin proqnozuna artıqlaması ilə əməl olunub.
Bu barədə AZƏRTAC-ın bölgə müxbirinə Oğuz Dövlət Aqrar İnkişaf Mərkəzinin bitkiçilik sektorunun baş məsləhətçisi Azər Vəliyev məlumat verib.
Qurum rəsmisi bildirib ki, səpin aparılan sahələrin 3 min 820 hektarı suvarılan, 13 min 318 hektarı isə dəmyə torpaqlardır. Kampaniya dövründə sahələrə 1080 ton sertifikatlaşmış buğda və 475 ton arpa toxumu səpilib. Hazırda taxıl sahələrində zərərvericilərə qarşı kimyəvi mübarizə tədbirləri davam etdirilir.
Xatırladaq ki, oğuzlu fermerlər ötənilki mövsümdə 16 min 317 hektar taxıl sahəsindən 58 min 655 ton məhsul tədarük ediblər. Hər hektardan orta hesabla 35 sentner məhsul götürülüb. Taxıl istehsalı əvvəlki illə müqayisədə 2 min tondan çox artıb.
Baş məsləhətçinin sözlərinə görə, təsərrüfatlarda yaş tütünün yığımı və qurudulması prosesi də artıq başa çatıb. Bu il oğuzlu fermerlər 160,1 hektar sahədə tütün yetişdirib, 510 ton quru tütün istehsal ediblər.
Bölmənin digər xəbərləri
