Ölkəmizdə COVID-19-a yoluxma sayı nəzarət altındadır
Bakı, 22 iyun, AZƏRTAC
Mayın axırlarından başlayaraq dünyada yeni növ koronavirusa (COVID-19) yoluxma sayında artım müşahidə edilir. Hətta bəzi ölkələrdə dördüncü doza peyvəndlə əlaqədar qərarlar verilib.
AZƏRTAC xəbər verir ki, Tibbi Ərazi Bölmələrini İdarəetmə Birliyinin (TƏBİB) infeksion nəzarət təşkili şöbəsinin əməkdaşı Turan İbrahimovanın dediyinə görə, ölkəmizdə həmin məsələ nəzarətdə saxlanılır: “Bəzi ölkələrdə COVID-19-a yoluxma sayında artımın baş verməsi infeksiyaya qarşı dördüncü doza peyvəndin vurulmasını gündəmə gətirib. Lakin bununla əlaqədar Ümumdünya Səhiyyə Təşkilatının heç bir tövsiyəsi yoxdur. Aidiyyəti qurumlar tərəfindən bu məsələ izlənilir və tövsiyə olunduğu təqdirdə bununla bağlı məlumat veriləcək. Xəstəxanalarda stasionar müalicə alan COVID-19 xəstələrinin sayında artım yoxdur. Lakin gələcək üçün bunu əvvəlcədən planlaşdırmaq qeyri-mümkündür. Hazırkı vəziyyətdə yoluxma sayı nəzarət altındadır. Meymunçiçəyi və koronavirusun eyni vaxtda yayıldığı şəraitdə hər kəs özünü qorumalı və ilk növbədə gigiyena qaydalarına riayət etməlidir”.
Bölmənin digər xəbərləri
